ބޮލީވުޑްގެ އެންމެ މަޝްހޫރު ބަތަލާއިން ތެރޭގައި ހިމެނޭ އާލިއާ ބަޓްގެ އިންސްޓަގްރާމް އެކައުންޓަށް 80 މިލިއަން ފޮލޯވަރުން ލިބިއްޖެ އެވެ.

ދެހާސް ބާރަ ވަނަ އަހަރު ނުކުތް 'ސްޓުޑެންޓް އޮފް ދަ އިޔާ' އިން ބޮލީވުޑަށް ތައާރަފުވި އާލިއާ ވަނީ ބެލުންތެރިން މެދުގައި މަގުބޫލު އެތަކެއް ފިލްމުތަކެއް ގެނެސްދީފަ އެވެ. އަދި އާލިއާ އަކީ މިހާރު ބޮލީވުޑްގައި ހުރި އެންމެ އުޅަދާނަ އެއް ބަތަލާ އެވެ. ފިލްމު ކުޅުމުގެ އިތުރުން އާލިއާ އަންނަނީ އަމިއްލަ ޕްރޮޑަކްޝަން ހައުސްއެއްވެސް ހިންގަމުންނެވެ.

އާލިއާގެ ހުނަރުވެރިކަމުގެ ސަބަބުން ކޮންމެ ދުވަހަކު ވެސް އޭނާ އަށް ސަޕޯޓު ކުރާ މީހުންގެ އަދަދު އަންނަނީ އިތުރުވަމުންނެވެ. އެގޮތުން އާލިއާ ވަނީ ސޯޝަލް މީޑިއާގައި ވެސް ބޮލީވުޑުގެ ބައެއް އަންހެން ފަންނާނުން ފަހަތަށް ޖައްސާލުމަށް ފަހު ކުރި ހޯދައިފަ އެވެ.

އިންސްޓަގްރާމްގައި ވަރަށް ހަރަކާތްތެރި އާލިއާ އަށް މިހާރު ވަނީ 80 މިލިއަން އަށް ވުރެ ގިނަ ފޮލޯވަރުން ލިބިފަ އެވެ. މިއީ ޝްރަދާ ކަޕޫރާއި ޕްރިޔަންކާއަށް ފަހު އެންމެ ގިނަ ޕްލޯވަރުން ތިބީ އާލިއާ އެވެ.

އާލިއާ ވަނީ ފޮޓޯއަކާ އެކު އިންސްޓަގްރާމްގައި ކުރި ޕޯސްޓެއްގައި ބުނެފައިވަނީ ފޭނުންދޭ ހިފަހެއްޓުމެއް ނެތް ލޯތްބަށްޓަކައި ޝުކުރު އަދާކުރާ ކަމަށާއި ފޭނުންނަކީ އެންމެ ރަނގަޅު ބައިވެރިން ކަމަށެވެ.

އާލިއާ ބަޓް އިންސްޓަގްރާމްގައި ކޮށްފައިވާ ޕޯސްޓް

އާލިއާ އަށް ޒުވާނުންގެ މެދުގައި ބޮޑު ފޭން ފޮލޯވަރުންތަކެއް ލިބެ އެވެ. އަދި ސޯޝަލް މީޑިއާގެ ހީވާގި ޔޫޒަރެއް ކަމަށާއި ގިނަ ފަހަރަށް އޭނާގެ ފޮޓޯތައް ފޭނުންނާއި ފޮލޯވަރުންނާ ހިއްސާކުރާ ކަމަށާއި އެ ފޮޓޯތައް އާންމުކޮށް ސޯޝަލް މީޑިއާގައި ވައިރަލް ވެއެވެ.

އާލިއާ މިހާރު އަންނަނީ އޭނާ އަމިއްލައަށް ޕްރޮޑިއުސްކޮށް، ކުޅޭ ދެވަނަ ފިލްމު "ޖިގްރާ" ގެ މަސައްކަތް ކުރަމުންނެވެ. މިފިލްމު ސިނަމާއަށް ގެނެސްދިނުމަށް ހަމަޖެހިފައިވަނީ އަންނަ އަހަރު އެވެ.

2021 ގައި އާލިއާ ލޯންޗްކުރި ފިލްމު ކުންފުނީގެ ފުރަތަމަ ގެނެސްދިން ފިލްމަކީ އާލިއާ ބަތަލާގެ ރޯލު ކުޅެ، މިދިޔަ އަހަރު ގެނެސްދިން "ޑާލިންސް" އެވެ.

މީގެ އިތުރުން އާލިއާ ފެނިގެންދާނީ ޕްރިޔަންކާ އާއި ކެޓްރީނާ ކައިފްއާ އެކު ޑައިރެކްޓަރު ފަރުހާން އަޚްތަރުގެ ފިލްމު ‘ޖީ ލެ ޒަރާ’ އިން ފެނިގެންދާނެ އެވެ. އެހެން ނަމަވެސް އެފިލްމުގެ ޝޫޓިން ފެށޭނެ ތާރިހެއް އަދި އިއުލާނެއް ނުކުރެ އެވެ.