އަންނަ އަހަރު ބާއްވާ ރައްޔިތުންގެ މަޖިލީހުގެ އިންތިހާބުގައި ޕީޕީއެމް/ޕީއެންސީން ވާދަކުރާ ކެންޑިޑޭޓުން ކަނޑައަޅަން ބޭއްވުމަށް ހަމަޖެއްސި ޕްރައިމަރީ އަންނަ މަހުގެ 20 ވަނަ ދުވަހު ބާއްވަން ނިންމައިފި އެވެ.

މީގެކުރިން އެ ޕްރައިމަރީ ބޭއްވުމަށް ނިންމާފައި އޮތީ މި މަހުގެ 23 ގަ އެވެ.

ޕީޕީއެމް/ޕީއެންސީން ނެރުނު އިއުލާނެއްގައި ބުނި ގޮތުގައި ޕްރައިމަރީ ފަސްކޮށްފައި ވަނީ ޕްރައިމަރީ ބާއްވަން ފުރަތަމަ ނިންމާފައިވާ ތާރީހަކީ ސްކޫލް ބަންދު ދުވަސްވަރަށް ވުމުންނެވެ.

އެގޮތުން ގިނަ އަދަދެއްގެ ރައްޔިތުން އެކިއެކި ބޭނުމަށާއި، އުމްރާއަށް ގައުމުން ބޭރަށް ދަތުރު ކުރުމަށް ހަމަޖެހިފައިވާތީ، ޕްރައިމަރީގައި ވާދަކުރާ ކެންޑިޑޭޓުންގެ ތެރެއިން ގިނަ ކެންޑިޑޭޓުންނާއި ކޯލިޝަންގެ އާންމު މެންބަރުން އެދިފައިވަނީ ޕްރައިމަރީ ފަސް ކުރަން ކަމަށް ޕީޕީއެމް/ޕީއެންސީން ބުންޏެވެ. އެހެންވެ އަންނަ ޖެނުއަރީ މަހުގެ 20 ވަނަ ދުވަހަށް ޕްރައިމަރީ ފަސްކޮށްފައިވާ ކަމަށް އިއުލާންގައިވެ އެވެ.

ޕްރައިމަރީއަށް ކުރިމަތިލީ ކެންޑިޑޭޓުންގެ ޝަރުތު ހަމަވޭތޯ ބެލުމަށް ފަހު ނަންތައް އަންނަ ހަފުތާ ތެރޭ އިއުލާންކުރާނެ ކަމަށް ވެސް އެ ޕާޓީން ބުންޏެވެ.

ޕީޕީއެމް/ޕީއެންސީ ޕްރައިމަރީ ބާއްވަނީ އެމްޑިއޭ އާއި އެމްއެންޕީ ވެސް ބައިވެރިކޮށްގެންނެވެ. އެ ދެ ޕާޓީގެ ކެންޑިޑޭޓުން ވާދަކުރާ ދާއިރާތަކަށް އެ ޕާޓީގެ އާންމު މެންބަރުންނަށް ވެސް ވޯޓު ލެވޭނެ ކަމަށް ޕީޕީއެމް/ޕީއެންސީން ވަނީ ބުނެފަ އެވެ.

މަޖިލިސް އިންތިހާބުގައި ޕީޕީއެމް/ޕީއެންސީން ވާދަކުރާނެ ކެންޑިޑޭޓުން ހޮވުމަށް ބާއްވާ ޕްރައިމަރީގައި ވާދަކުރުމަށް 350 އަށް ވުރެ ގިނަ ފޯމް ވަނީ ހުށަހަޅައިފަ އެވެ. އޭގެތެރެއިން 10 ދާއިރާއަކުން އެއް ފަރާތްތަކުން ފޯމު ހުށައަޅާފައިވާތީ އެފަރާތްތަކަށް ޓިކެޓް ކަށަވަރުވެފައިވާ ކަމަށް ޕީޕީއެމް/ޕީއެންސީން ބުނެ އެވެ.

އަންނަ އަހަރު އޮންނަ ރައްޔިތުންގެ މަޖިލީހުގެ އިންތިހާބުގައި 93 ދާއިރާއަކަށް މެންބަރުން އިންތިހާބުކުރާނެ އެވެ.