ހެލިކޮޕްޓަރުގައި ދަތުރުކުރައްވަނިކޮށް ގެއްލުނު އީރާނުގެ ރައީސް އިބްރާހިމް ރައިސީ 14 ގަޑިއިރަށް ވުރެ ގިނައިރު ވީއިރު ވެސް ނުފެންނަ ކަމަށް އެ ގައުމުގެ މީޑިއާތަކުން ބުނެފި އެވެ.

އީރާނުގެ ބައެއް ނޫސްތަކުގައި ބުނެފައި ވަނީ އީރާނުގެ ރައީސް ދަތުރުކުރެއްވި ހެލިކޮޕްޓަރު ފަރުބަދަމަތީ ސަރަހައްދަކަށް ވެއްޓިފައިވާ ކަމަށް މިހާރު ވަރަށް ބޮޑަށް ބެލެވޭ ކަމަށެވެ. އަދި އެ ހެލިކޮޕްޓަރު ވެއްޓުނު ސަރަހައްދުން ދުން އަރާ މަންޒަރު ފެންނަ ވީޑިއޯއެއް ސޯޝަލް މީޑިއާގައި އަންނަނީ ދައުރުވަމުންނެވެ. މި ވީޑިއޯއަކީ އެ ހެލިކޮޕްޓަރު ހޯދަން ބޭނުންކުރި ތުރުކީގެ ޑްރޯންއަކުން ނެގި މަންޒަރުތަކެކެވެ.

އީރާނުގެ ރިވޮލިއުޝަނަރީ ގާޑުގެ ކޮމާންޑަރަކު ވިދާޅުވީ ހެލިކޮޕްޓަރު ވެއްޓުނު ސަރަހައްދު މިހާރު ދެނެގަނެވިފައިވާ ކަމަށެވެ. އަދި އެ ސަރަހައްދުން ތެލާއި ދުމުގެ ވަސް ދުވާ ކަމަށް ބުނެފައިވެ އެވެ.

އެކަމަކު އެ ސަރަހައްދު ބެލިއިރު ވެއްޓުނު ހެލިކޮޕްޓަރުގެ އެއްވެސް ނިޝާނެއް ފެންނަން ނެތް ކަމަށްވެ އެވެ.

https://www.hurihaa.mv/29768

ގެއްލުނު ރައިސީ ހޯދުމުގެ މަސައްކަތުގައި އީރާނުގެ 70 އަށް ވުރެ ގިނަ ސާޗް އެންޑް ރެސްކިއު ޓީމު އެ ސަރަހައްދުގައި މިހާރު އަންނަނީ ހަރަކާތްތެރިވަމުންނެވެ. މީގެ ތެރޭގައި އީރާނުގެ ރިވޮލިއުޝަނަރީ ގާޑުގެ 65 ވަނަ ޑިވިޝަންގެ ޓީމު ވެސް ހިމެނެ އެވެ.

އީރާނުގެ ރައީސް އިބްރާހިމް ރައިސީ

ހެލިކޮޕްޓަރު ވެއްޓެން ދިމާވީ މޫސުން ވަރަށް ބޮޑަށް ގޯސްވެގެންނެވެ. އަދި އެ ސަރަހައްދު ހޯދުމުގެ މަސައްކަތަށް އެޅިފައިވާ އެންމެ ބޮޑު ހުރަހަކީ ވެސް މޫސުން ތަން ނުދިނުމުން އެ ސަރަހައްދަށް ދަތުރުކުރުން ކަމަށް އީރާނުގެ ކަމާ ބެހޭ ފަރާތްތަކުން ބުނެފައިވެ އެވެ.

އީރާނުގެ ރައީސްގެ އަރިހުގައި ފޮރިން މިނިސްޓަރު ހުސައިން އާމިރު އަބްދުﷲ ހިން ވެސް ދަތުރު ކުރެއްވި ކަމަށް ރަސްމީ މީޑިއާ އިން ބުނެ އެވެ. ރައީސް ހެލިކޮޕްޓަރު ހިމެނޭ ކޮންވޯއީގައި އިތުރު ދެ ހެލިކޮޕްޓަރު ވެސް ދަތުރުކުރި އެވެ.