ހެލިކޮޕްޓަރު ވެއްޓުނު ހާދިސާގައި އީރާނުގެ ރައީސް އަވަހާރަވެއްޖެ

ހެލިކޮޕްޓަރު ވެއްޓުނު ހާދިސާގައި އީރާނުގެ ރައީސް އިބްރާހިމް ރައިސީ އަވަހާރަވެއްޖެ ކަމަށް އެ ގައުމުގެ މީޑިއާތަކުން ބުނެފި އެވެ.

ރައީސްގެ ހެލިކޮޕްޓަރު ވެއްޓުމަށް ފަހު ހޯދުމުގެ މަސައްކަތް ކުރިއަށްދާއިރު، އީރާނުގެ ޓީވީތަކުން ބުނީ ރައީސްގެ ހެލިކޮޕްޓަރު ވެއްޓުނު ސަރަހައްދުގައި "ދިރިހުރި ފުރާނައެއްގެ އެއްވެސް ނިޝާނެއް" ފެންނަން ނެތް ކަމަށެވެ.

މިކަން އީރާނުގެ ނައިބު ރައީސްގެ އޮފީހުން ވެސް މިހާރު ވަނީ ކަށަވަރުކޮށްދީފަ އެވެ.

އީރާނުގެ ރައީސް ދަތުރުކުރެއްވި ހެލިކޮޕްޓަރު ވެއްޓެން ދިމާވީ މޫސުން ވަރަށް ބޮޑަށް ގޯސްވެގެންނެވެ. އަދި އެ ސަރަހައްދު ހޯދުމުގެ މަސައްކަތަށް އެޅިފައިވާ އެންމެ ބޮޑު ހުރަހަކީ ވެސް މޫސުން ތަން ނުދިނުމުން އެ ސަރަހައްދަށް ދަތުރުކުރުން ކަމަށް އީރާނުގެ ކަމާ ބެހޭ ފަރާތްތަކުން ބުނެފައިވެ އެވެ.

އީރާނުގެ ރައީސްގެ އަރިހުގައި ފޮރިން މިނިސްޓަރު ހުސައިން އާމިރު އަބްދުﷲ ހިން ވެސް ދަތުރު ކުރެއްވި ކަމަށް ރަސްމީ މީޑިއާ އިން ބުނެ އެވެ. ރައީސް ހެލިކޮޕްޓަރު ހިމެނޭ ކޮންވޯއީގައި އިތުރު ދެ ހެލިކޮޕްޓަރު ވެސް ދަތުރުކުރި އެވެ.

އީރާނުގެ ރައީސް އިބްރާހިމް ރައިސީއަކީ:

• ވެރިކަމަށް ވަޑައިގެންނެވީ 2021 ވަނަ އަހަރުގެ އޮގަސްޓް މަހު.
• 2021 ވަނަ އަހަރުގެ ރިޔާސީ އިންތިޚާބުގައި 62.9 އިންސައްތަ ވޯޓު ކާމިޔާބުކުރެއްވި
• އީރާނުގެ ރޫހީ ލީޑަރުކަމަށް ދެން ވަޑައިގަންނަވާނެ ކަމަށް ވަރަށް ބޮޑަށް ބެލެވުނު.
• 80ގެ ފަހުކޮޅު ސިޔާސީ ގައިދީންނަށް މަރުގެ އަދަބު ދިނުމުގައި ޕްރޮސެކިއުޝަން ކޮމެޓީގައި އަދާކުރި ދައުރުގެ ގޮތުން "ބުޗާ އޮފް ތެހެރާން" ގެ ގޮތުގައި ސިފަކުރި

ހެލިކޮޕްޓަރު ވެއްޓެން ދިމާވި ހާދިސާގެ ތަފްސީލް އެއްވެސް ފަރާތަކުން އަދި ހާމަކޮށްފައެއް ނުވެ އެވެ. އެ ހެލިކޮޕްޓަރު ވެއްޓިފައި ވަނީ އީރާނުގެ އިރު އުތުރުގެ ސިޓީއެއް ކަމަށްވާ ތަބްރީޒްގެ ފަރުބަދަމަތީ ސަރަހައްދަކަށެވެ. އެ ހެލިކޮޕްޓަރުގައި ރައިސީ ދަތުރު ކުރެއްވީ އީރާން-އާޒަބައިޖާން ބޯޑަރު ސަރަހައްދުގައި އޮތް ޑޭމެއް ހުޅުވުމުގެ ރަސްމިއްޔާތަކަށް ފަހު އެވެ. ހެލިކޮޕްޓަރު ވެއްޓުނު ހިސާބަށް ވަރަށް ބޯކޮށް ވާރޭ ވެހި ފޮގް ފައިބަމުންދިޔަ ކަމަށް މީޑިއާތަކުން ރިޕޯޓްކޮށްފައިވެ އެވެ.

އީރާނުގެ ރައީސްކަމަށް އުމުރުފުޅުން 63 އަހަރުގެ ރައިސީ އަކީ އީރާނުގެ ރޫހީ ލީޑަރު އާޔަތުﷲ ޚާމަނާއީގެ މަގާމަށް ދެން ވަޑައިގަންނަވާނެ ކަމަށް އެންމެ ބޮޑަށް ބެލެވޭ ބޭފުޅާ އެވެ.