އިސްލާމިކް ރިޕަބްލިކް އޮފް އީރާނުގެ ރައީސް ޑޮކްޓަރު ސައްޔިދު އިބްރާހީމް ރައީސީ އަވަހާރަވުމުގެ ހިތާމައިގައި، މެއި 21، 2024 ވާ އަންގާރަ ދުވަހުން ފެށިގެން 23 މެއި، 2024 ވާ ބުރާސްފަތި ދުވަހުގެ ނިޔަލަށް، (ތިން ދުވަސް ވަންދެން) ދިވެހި ގައުމީ ދިދަ ބައިދަނޑިއަށް ތިރިކުރެއްވުމަށް ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ހަމަޖައްސަވައިފި އެވެ.

މި ކަން އިޢުލާންކުރައްވާފައި ވަނީ، ރައީސުލްޖުމްހޫރިއްޔާގެ އޮފީހުން މިއަދު ނެރުއްވި 2024/10 ނަންބަރު ދެންނެވުމުގަ އެވެ.

އީރާނުގެ ރައީސް ރައިސީ އަވަހާރަވީ ހެލިކޮޕްޓަރު ވެއްޓުމުގެ ހާދިސާއެއްގަ އެވެ. ރައީސް ރައިސީ ދަތުރުކުރެއްވި ހެލިކޮޕްޓަރު ވެއްޓެން ދިމާވީ މޫސުން ވަރަށް ބޮޑަށް ގޯސްވެގެންނެވެ. އެ ހާދިސާ ހިނގީ އުތުރުގައި އޮންނަ އަޒަރުބައިޖާން ސަރަހައްދުގައި ޑޭމް ޕްރޮޖެކްޓެއް އިފްތިތާހު ކުރެއްވުމަށްފަހު އެނބުރި ވަޑައިގެންނެވި މަގުމަތީގަ އެވެ. އަދި މޫސުން ތަން ނުދިނުމުން އެ ސަރަހައްދަށް ދަތުރުކުރުރަން 15 ވަރަކަށް ގަޑިއިރު ހޭދަވި ކަމަށް އީރާނުގެ ކަމާ ބެހޭ ފަރާތްތަކުން ބުނެފައިވެ އެވެ.

ހެލިކޮޓަރު ވެއްޓުމުގެ ހާދިސާގައި އީރާނުގެ ފޮރިން މިނިސްޓަރު ހުސައިން އާމިރު އަބްދުﷲ ވެސް ވަނީ އަވަހާރަވެފަ އެވެ.

އީރާނުގެ ރައީސް އަވަހާރަވުމުން އެ ގައުމުގެ ވަގުތީ ރައީސްގެ ގޮތުގައި ފުރަތަމަ ނައިބް ރައީސް މުހައްމަދު މުޚްބިރު މިހާރު ވަނީ އައްޔަންކޮށްފަ އެވެ.