އިރާންގެ ރައީސް އިބްރާހިމް ރައީސީ އާއި އެ ގައުމުގެ ފޮރިން މިނިސްޓަރު ހުސައިން އަމީރު އަބްދުالله ހައިންގެ ޖަނާޒާގައި ބައިވެރިވެވަޑައިގަތުމަށް ލޯކަލް ގަވަމެންޓް މިނިސްޓަރު އާދަމް ޝަރީފް އުމަރު އެ ގައުމަށް މިރޭ ފުރާވަޑައިގެންފި އެވެ.

ރައީސް އޮފީހުން ބުނީ، މިނިސްޓަރު އިރާނަށް ވަޑައިގަންނަވަނީ ރައީސް ޑރ. މުހައްމަދު މުއިއްޒުގެ ހާއްސަ މަންދޫބެއްގެ ގޮތުގައި ކަމަށެވެ.

އެ ދެ ބޭފުޅުންނަށް އެންމެ ފަހުގެ އިހުތިރާމް އަދާކުރައްވައި ފަސްދާނުލުމުގެ ރަސްމިއްޔާތުގައި އާދަމް ޝަރީފް ބައިވެރިވެވަޑައިގަންނަވާނެ ކަމަށް އެ އޮފީހުން ބުންޏެވެ.

ރައީސީ އާއި ފޮރިން މިނިސްޓަރު އަވަހާރަވީ އެ ބޭފުޅުން ދަތުރު ކުރެއްވި ހެލިކޮޕްޓަރު ވެއްޓިގެންނެވެ.

ރައިސީއާ އެކު އެ ހެލިކޮޕްޓަރުގައި ދަތުރުކުރެއްވި އިރާނުގެ ފޮރިން މިނިސްޓަރުގެ އިތުރުން އުތުރު އަޒަރުބައިޖާނު ޕްރޮވިންސްގެ ގަވަރުނަރު މާލިކު ރަހުމަތީ އަދި ތަބްރީޒުގެ އިމާމު މުހައްމަދު އަލީ އަލްހާޝިމް ވެސް ވަނީ އަވަހަރާވެފަ އެވެ. އަދި އެ ހެލިކޮޕްޓަރުގައި ޕައިލެޓާއި ކޯޕައިލެޓާއި، ކްރޫ ޗީފް އަދި ބޮޑީގާޑު ވެސް ވަނީ މަރުވެފަ އެވެ.

ރައީސީ އަވަހާރަވުމާ ގުޅިގެން ދިވެހި ދިދަ ތިން ދުވަސް ވަންދެން ބައި ދަނޑިއަށް ތިރި ކުރަން ވަނީ ނިންމައިފަ އެވެ.