ޖުޑިޝަލް ސާވިސް ކޮމިޝަނަކީ މިހާރު ދެފުއްފެންނަ، ހާމަކަމާއެކު އެކޮމިޝަންގެ މަސައްކަތް ކުރާ އަދި ރައްޔިތުންގެ އިތުބާރު ހޯދިފައިވާ ތަނެއް ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.

އެ ކޮމިޝަނުގެ ރައީސް ހިސާން ހުސައިންއާ މިއަދު ބައްދަލުކުރައްވައި ދެއްކެވި ވާހަކަފުޅުގައި ޝާހިދު ވިދާޅުވީ ނިމިދިޔަ ފަސް އަހަރުގެ ތެރޭގައި ޝަރުއީ ދާއިރާ ހަރުދަނާކުރުމަށް އެޅުނު އިސްލާހީ ފިޔަވަޅުތަކުގެ ތެރޭގައި، ކޯޓުތައް ޓެކްނޮލޮޖީއާ ރައްޓެހި ތަނަކަށް ހެދުމަށް ހިންގި ކޯޓް މޮޑެނައިޒޭޝަން ޕްރޮޖެކްޓްގެ ތެރެއިން އޮންލައިކޮށް ޝަރިއާތްކުރުން ތައާރަފްކުރުން ފާހަގަކޮށްލަންޖެހޭ ކަމަށެވެ. އަދި ޝަރީއަތްތަށް މަހުޒަރުކުރުމަށް ކޯޓުތަކުގައި ސްޕީޗް ޓު ޓެކްސްޓް ބޭނުންކުރަން ފެށުމާއި، އިންޓަގްރޭޓަޑް ކޯޓް މެނޭޖްމަން ސިސްޓަމް ގާއިމުކުރުމުގެ އިތުރުން މަތީ މަރުހަލާގެ ކޯޓުތަކުގެ އަޑުއެހުންތައް އިންޓަނެޓުގައި ލައިވްކާސްޓްކުރުން ފަދަ ކަންކަން ކަމަކީ ހޯދިފައިވާ މުހިންމު ކާމިޔާބީއެއް ކަމަށް އޭނާ ފާހަގަކުރެއްވި އެވެ.

ޝާހިދު ވަނީ އެމްޑީޕީގެ ސިޔާސަތުގެ ތެރެއިން އަންހެނުން ބާރުވެރިކުރުވުމަށް ހިސާން ކުރައްވާފައިވާ މައްސައްކަތް ފާހަގަކުރައްވާފަ އެވެ. އެގޮތުން 2018 ވަނަ އަހަރުން ފެށިގެން މިއަދާހަމައަށް އަންހެން ފަނޑިޔާރުނގެ އަދަދު އިތުރުކުރެވި، ހާއްސަކޮށް ޝަރުއީ ދާއިރާގެ ހިންގުމުގެ އިސް މަގާމްތަކުގައި އަންހެނުން އިތުރު ކުރެވިފައިވާ ކަމީ ހޯދުނު މުހިންމު ކާމިޔާބީއެއް ކަމަށް އޭނާ ވިދާޅުވި އެވެ.

މީގެ އިތުރުން، ޖުޑީޝަލް ސާވިސް ކޮމިޝަންގެ ރައީސްގެ ހައިސިއްޔަތުން ޝަރުއީ ދާއިރާއަށް ހިސާން ކޮށްދެއްވި ބުރަ މަސައްކަތަށް ޝާހިދު ޝުކުރު އަދާކުރެއްވި އެވެ. ހަމައެއާއެކު، ޖުޑީޝަލް ސާވިސްކޮމިޝަންގެ ފުރަތަ އަންހެން ރައީސްއަކީ، އަދި އެކޮމިޝަންގެ ރައީސް ކަމުގެ ދައުރު ފުރިހަމަ ކުރެއްވި ފުރަތަމަ މެންބަރަކީ އެމްޑީޕީއަށް ނިސްބަތްވެވަޑައިގަންނަވާ މެންބަރަކަށް ވުމީ އެޕާޓީއަށް ލިބުނު ޝަރަފެއްކަމުގައި ޝާހިދު ވިދާޅުވި އެވެ.