އެމެރިކާގެ ސްޓޭޓްއެއް ކަމަށްވާ ނޯތް ކެރޮލިނާގެ އެކުއޭރިއަމްގައި ގެންގުޅޭ މަޑި "ޗާލޮޓް" ބަނޑުބޮޑުވެފައި ވަނީ އާދަޔާހިލާފު ގޮތަކަށެވެ.

ޗާލޮޓްއަކީ އެކަނި އެކުއޭރިއަމް ތެރޭ އޮންނަ މަޑިއެކެވެ. މި ވައްތަރުގެ މަޑި ދަރިމައިވުމަށް ފިރިހެން މަޑިއެއް ބޭނުންވާނެ އެވެ. ނަމަވެސް ޗާލޮޓް މާބަނޑުވެފައި ވަނީ އެކަނި އެކުއޭރިއަމްގައި ދިރިއުޅޭތާ 8 އަހަރުވީ ފަހުންނެވެ. އެހެންކަމުން އޭތި ބަނޑުބޮޑުވުންވީ ވަރަށް ހައިރާން ކުރުވަނިވި ކަމަކަށެވެ. މި ކަންވަނީ މި އަހަރުގެ ފެބްރުއަރީ މަހުގެ ތެރޭ ދުނިޔޭގެ ސަމާލުކަމަށް އައިސްފަ އެވެ.

ޗާލޮޓްގެ ބަނޑުގައި ތިނެއް ނުވަތަ ހަތަރު މަޑިއޮތް ކަމަށް އެކުއޭރިއަމް ހިންގާ ފަރާތުން ވަނީ ބުނެފަ އެވެ. އަދި އޭތި ވިހާނެ ދުވަހަށް އިންތިޒާރުކޮށްގެން ތިއްބާ ޗާލޮޓް ބަލި ވެއްޖެކަމަށް އެ ފަރާތުން ވަނީ ބުނެފަ އެވެ.

އެކުއޭރިއަމްގެ ވެރިން ހެދި ޓެސްޓުތަކުން އެނގޭ ގޮތުގައި ޗާލޮޓްއަށް ޖެހިފައި ވަނީ އާންމުކޮށް ނުޖެހޭ ރިޕްރޮޑަކްޓިވް ބައްޔެއް ކަމަށެވެ.

އެހެންކަމުން އެ ފަރާތުން ފަރުވާ ދިނުމަށްޓަކައި މި ވަގުތަށް ޗާލޮޓް އޮންނަ ތަން ވަނީ ބަންދުކޮށްފަ އެވެ.