މަސްތުވާތެކެތީގެ މައްސަލައެއްގައި ތެލަގޫ ބަތަލާ ހެމާ ހައްޔަރުކޮށްފި އެވެ.

ހެމާ ހައްޔަރުކޮށްފައިވަނީ ބެންގަލޫރުގައި އޮތް ޕާޓީއެއްގައި މަސްތުވާތަކެތި ބޭނުންކުރި މައްސަލައެއްގަ އެވެ. މި މައްސަލައާ ގުޅިގެން ހެމާއާ ސެންޓްރަލް ކްރައިމް ބްރާންޗް (ސީސީބީ) އިން ވަނީ ސުވާލު ވެސް ކޮށްފަ އެވެ.

މި ޕާޓީ އޮތީ މެއި މަހުގެ 19 ވަނަ ދުވަހު އިލެކްޓްރޯނިކް ސިޓީ ކައިރީގައި ހުންނަ ފާމް ހައުސްއެއްގަ އެވެ. އުފަންދުވަސް ފާހަގަ ކުރުމަށް ކަމަށް ބުނެ ކުރިއަށް ގެންދިޔަ ޕާޓީގައި ވަނީ މަސްތުވާތަކެތި ބޭނުންކޮށްފަ އެވެ.

ސީސީބީއަށް ލިބުނު މައުލޫމާތަކާ ގުޅިގެން އެޕާޓީއަށް ގޮސް އެޕާޓީގައި ބައިވެރިވި މީހުންގެ ލޭގެ ސާމްޕަލް ވެސް ވަނީ ނަގާފަ އެވެ.

ލޭގެ ޓެސްޓު ރިޕޯޓްތަކުން ފަހުން ކަށަވަރުވެފައިވާ ގޮތުގައި ހެމާ ހިމެނޭ ގޮތަށް 86 މީހަކު މަސްތުވާތަކެއްޗަށް ޕޮޒިޓިވްވެފައިވާ ކަމަށް ފުލުހުންނާ ހަވާލާދީ ރިޕޯޓްތައް ބުނެ އެވެ.

އެ ޕާޓީގައި ޖުމްލަ 103 މީހުން ބައިވެރިވެފައިވެ އެވެ. ބައިވެރިންގެ ތެރޭގައި ހިމެނެނީ 73 ފިރިހެނުންނާއި 30 އަންހެނުންނެވެ.

މިޕާޓީ ތެރެއިން ފުލުހުން ވަނީ 1.5 ކްރޯޑް ރުޕީސްގެ މަސްތުވާތަކެތި އަތުލައިގެންފަ އެވެ.