އިހުސާން ވިދާޅުވީ ދައުލަތުން އަހަރެއްގެ މައްޗަށް ފުލުހުންނަށް ދެ ބިލިއަން ރުފިޔާ ހަރަދު ކުރާ ކަމަށް. އަދި މިއީ ދިިވެހި ދައުލަތުގެ 4 އިންސައްތަ ކަމަށާއި ލިބޭ ކޮންމަ 100ރ. އަކުން 4ރ. ފުލުހުންގެ ހިދުމަތަށް ދޭ ކަމަށް އޭނާ ވިދާޅުވި.

ފުލުހުންނަކީ ޒިންމާދާރު، ޒިންމާ ނަގައި އަދި ނަތީޖާ ނެރޭ ބަޔަކަށް ވާން ޖެހޭ ކަމުގައި ހޯމްލޭންޑް ސެކިއުރިޓީ މިނިސްޓަރު އަލީ އިހުސާން މިއަދު ވިދާޅުވެއްޖެ އެވެ.

ކުރިއަށް އޮތް ހަތަރު އަހަރު ދުވަހުގެ ސްޓްރެޓެޖިކް ޕްލޭން އިފްތިތާހުކުރުމަށް އިސްކަންދަރު ކޮށީގައި ބޭއްވި ރަސްމިއްޔާތުގައި ވާހަކަ ދައްކަވަމުން އިހުސާން ވިދާޅުވީ ފުލުހުންނަށް މިނިވަންކަމާ އެކު މަސައްކަތް ކުރުމުގެ ފުރިހަމަ ބާރު ވެސް އޮންނާނެ ކަމަށެވެ. އެހެންވެ، ފުލުހުން ވެސް ޒިންމާ ނަގައި ޒިންމާދާރު ބަޔަކަށް ވާން ޖެހޭ ކަމުގައި އޭނާ ވިދާޅުވި އެވެ.

ވަކި ގޮތަކަށް އަމަލުކުރަން ފުލުހުންގެ މައްޗަށް ސަރުކާރުގެ އެއްވެސް ހިސާބަކުން ނާންގާނެ ކަމަށާއި ފުލުހުންގެ މައްޗަށް އެއްވެސް ނުފޫޒެއް ވެސް ނާންނާނެ ކަމުގައި އިހުސާން ވިދާޅުވި އެވެ.

"އަދުގެ ސަރުކާރުން ތިބޭފުޅުންގެ މައްޗަށް އެއްވެސް މީހަކު ނުފޫޒެއް ނުފޯރުވާނެ މިވެނި މީހަކާ ދޭތެރޭ މިވެނި ގޮތަކަށް އަމަލުކުރާކަށް،" އިހުސާން ވިދާޅުވި އެވެ.

އިހުސާން ވިދާޅުވީ ދައުލަތުން އަހަރެއްގެ މައްޗަށް ފުލުހުންނަށް ދެ ބިލިއަން ރުފިޔާ ހަރަދު ކުރާ ކަމަށެވެ. އަދި މިއީ ދިިވެހި ދައުލަތުގެ 4 އިންސައްތަ ކަމަށާއި ލިބޭ ކޮންމަ 100ރ. އަކުން 4ރ. ފުލުހުންގެ ހިދުމަތަށް ދޭ ކަމަށް އޭނާ ވިދާޅުވި އެވެ.

މިވަރުގެ ހަރަދެއް ދިވެހި ދައުލަތުން ފުލުހުންނަށް ކުރާއިރު ދައުލަތާއި ރައްޔިތުންގެ އުއްމީދެއް އޮންނާނެކަމަށާއި އެ އުއްމީދަކީ ނަތީޖާ ނެރެދިނުން ކަމަށް އިހުސާން ވިދާޅުވި އެވެ. އިހުސާން ވިދާޅުވީ ފުލުހުންގެ މަސައްކަތްތައް ތަރުތީބުކުރެވިގެން އަންނަން ޖެހޭނީ އޭރަކު ސަރުކާރު ހިންގާ ބަޔަކު ކަނޑައަޅާ އަސާސްތަކެއްގެ މައްޗަށް ކަމަށެވެ.