ސިންގަޕޫރު (ޖުލައި 2) - އިޒްރޭލު ދެމިއޮތުމުގެ ހައްގަށް އިހްތިރާމު ކުރާ ހަރުދަނާ ސަރުކާރަކާއެކު ފަލަސްތީނު ދައުލަތެއްގެ ގޮތުގައި ބަލައިގަންނަން ތައްޔާރަށް އޮތްކަމަށް ސިންގަޕޫރުން ބުނެފި އެވެ.

ޓެރަރިޒަމް ދޫކޮށްލައި އިޒްރޭލު ދެމިއޮތުމުގެ ހައްގު ގަބޫލުކުރާ ހަރުދަނާ ސަރުކާރަކާއެކު ފަލަސްތީނަކީ މުސްތަގިއްލު ދައުލަތެއްގެ ގޮތުގައި ބަލައިގަތުމަށް ސިންގަޕޫރު އޮތީ އުސޫލެއްގެ ގޮތުން ތައްޔާރަށް ކަމަށް އެ ގައުމުގެ ފޮރިން މިނިސްޓަރު ވިވިއަން ބާލަކްރިޝްނަން ޕާލަމެންޓުގައި ވިދާޅުވި އެވެ.

ވިވިއަން ބާލަކްރިޝްނަން މިހެން ވިދާޅުވީ ފަލަސްތީނު އަލުން ބިނާކުރުމަށް ސިންގަޕޫރުން ދޭ އެހީއާ ބެހޭގޮތުން ޕާލަމެންޓްގެ މެންބަރުން ކުރެއްވި ސުވާލަކަށް ޖަވާބު ދެއްވަމުންނެވެ.

ވިވިއަން ބާލަކްރިޝްނަން ވިދާޅުވީ، މިއަހަރުގެ މެއި މަހު ސިންގަޕޫރުން އދ.ގައި ފަލަސްތީނަށް މެމްބަރުކަން ދިނުމަށް ތާއީދުކުރާކަން ހާމަކޮށް ފާސްކުރި ގަރާރަށް ތާއީދުކޮށް ވޯޓު ދިނީ ވަރަށް ބޮޑަށް ވިސްނުމަށްފަހު ކަމަށެވެ.

"މިކަމުން ދައްކުވައިދެނީ އިޒްރޭލާއި ފަލަސްތީނަށް ވެސް ދެ ދައުލަތުގެ ހައްލަކަށް ސީދާ މަޝްވަރާތައް ފެށުމަށް ސިންގަޕޫރުން ބާރުއަޅާކަން،" އޭނާ ވިދާޅުވި އެވެ.

އެ ނިންމުމަކީ ބައިނަލްއަގުވާމީ ގާނޫނުތަކުގެ އުސޫލުތަކަށް ސިންގަޕޫރުން އަބަދުވެސް ތާއީދު ކުރާ ނިންމުމެއް ކަމަށް އޭނާ ވިދާޅުވި އެވެ. އަދި ސިންގަޕޫރުން އަބަދުވެސް ވަކާލާތު ކުރަމުން އަންނަ ފަދައިން ހަމަނުޖެހުންތަކަށް ފުރިހަމަ، އިންސާފުވެރި އަދި ދެމެހެއްޓެނިވި ހައްލެއް ހޯދުމުގެ ހަމައެކަނި ހަރުދަނާ މަގަކީ ދެ ދައުލަތުގެ ހައްލެއް ކަމަށް އޭނާ ވިދާޅުވި އެވެ.

ފަލަސްތީނު އާރާސްތުކުރުމަށް ސިންގަޕޫރުން 10 މިލިއަން ޑޮލަރު (7.4 މިލިއަން ޑޮލަރު) ގެ އެންހޭންސްޑް ޓެކްނިކަލް އެސިސްޓެންސް ޕެކޭޖް ފޯރުކޮށް ދިނުމުގެ މަސައްކަތް ކުރިއަށް ގެންދާނެ ކަމަށް ވިވިއަން ބާލަކްރިޝްނަން ވިދާޅުވި އެވެ. މީގެ ތެރޭގައި ފަލަސްތީނު އޮތޯރިޓީތަކުގެ ކެޕޭސިޓީ އިތުރުކުރުމުގެ ގޮތުން ފަލަސްތީނުގެ އޮފިޝަލުން ތަޖުރިބާގެ ދަތުރުތަކުގައި ސިންގަޕޫރަށް އައުމާއި އެކި ދާއިރާތަކުން މީހުން ތަމްރީނުކުރުން ހިމެނެ އެވެ.