ފިރިމީހާއަށް ކާއެތިކޮޅު ދެނީ ވެސް ބިދޭސީއެއް ކަމަށާއި، އަނބިމީހާ އޮންނަނީ ގޭގައި ކަސޯޓީ ބަލަން ކަމަށް ވިދާޅުވެ ވާހަކަ ދެއްކެވުމުން ހުޅުމާލެ އުތުރު ދާއިރާގެ ޕީއެންސީ މެންބަރު ހުސައިން ޝަރީފަށް ފާޑުކިޔުން އަމާޒުވެއްޖެ އެވެ.

މެންބަރު ހުސެން މި މޭރުމުން ވާހަކަދެއްކެވީ ހޯމަ ދުވަހު ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅި ޤާނޫނު ނަންބަރު2/2008 (ވަޒީފާއާބެހޭ ޤާނޫނު) އަށް އިސްލާހު ގެނައުމުގެ ބިލުގެ އިބްތިދާއީ ބަހުސްގެ ތެރެއިންނެވެ.

ހުސެން ވިދާޅުވީ، މަސްވެރިކަމަށް ބެލިއަސް ތިބެނީ ބިދޭސީންކަމަށާއި، ކަންމަތީ ފިހާރައަކަށް ބެލިއަސް ބިދޭސީންކަމަށާއި، ސައި ހޮޓަލަކަށް ބެލިއަސް، އަދި ކޭޝިޔަރަކަށް ބެލިއަސް މިގޮތަށް ގޮސް ގޭގައި ކައްކާ ކާއެތިކޮޅު ފޯރުކޮށްދިނުމަށް ވެސް އަނބިމީހާގެ ބަދަލުގައި މިހާރު ހުރީ ބިދޭސީއެއް އްކަމަށެވެ.

"އަނބިމީހާ އޮންނަނީ ގޭގެ ރީތިކޮށް ދެފައި، ދަމާލައިގެން، އޭނަ އިންނަނީ ގޭގައި ކޮންމެވެސް ކަސޯޓީއެއް އެއްޗެއް ބައްލަވަން، އަޅުގަނޑުމެން ފިރިމީހާ ގެއަށް ދާއިރުގައި ކާއެތިކޮޅު ފޯރުކޮށްދޭން ވެސް މިހާރު ބިދޭސީއެއް، މަޖާތަންކޮޅަކީ ވެސް ހުންނަނީ ބިދޭސީ ފިރެހެނެއް" އޭނާ ވިދާޅުވި އެވެ.

ހުސެން ޝަރީފް މިގޮތަށް ވާހަކަދެއްކެވުމުން ގިނަ ބަޔަކު ދަނީ އެ ވާހަކަތަކާއި ވިސްނުމާ މެދު ހިތްހަމަނުޖެހި ފާޑުކިޔަމުންނެވެ. ގިނަ ބަޔަކު ބުނާގޮތުގައި މެންބަރު ހުސެންގެ އެ ވާހަކައަކީ އަންހެނުންނަށް އިހްތިރާމް ކުޑަވާގޮތަށް ދައްކަވާފައިވާ ވާހަކައެކެވެ.

އެކާވީސް ވަނަ ގަރުނާ ނުގުޅޭ ބޯދާ ވިސްނުމެއްގެ ވާހަކަތަކާއެކު މެންބަރު ހޫނުފެނަށް ވެއްޓުނުއިރު، މަދުން ނަމަވެސް ބައެއް މަޖިލިސް މެންބަރުންގެ ފަރާތުން މިފަދަ ވާހަކަތައް ދަނީ މަޖިލިސް ތަޅުމުގައި އިވެމުންނެވެ. މެންބަރުން މިހާރަށް ވުރެން ބޮޑަށް މަޖިލިސްގައި ބަހުސް ކުރުމަށް އޮންނަ މައުލޫއަށް އަހުލުވެރިވެ، ދިރާސާކޮށް ފިލާވަޅު ހައްދަވައިގެން ޖަލްސާއަށް ވަޑައިގަންނަވާނަމަ މިފަދަ މައްސަލަތަށް މަދުވާނެކަމަށް ބެލެވެ އެވެ.

މިއާއެކު މެންބަރުންނަށް ޖެންޑާ ސެންސެޓައިޒޭޝަން ޕްރޮގްރާމްތައް ފަދަ މިފަދަ ނާޒުކު މައުލޫތަކަށް އަހުލުވެރިވާނެ ރަނގަޅު ހޭލުންތެރިކުރުމުގެ ކްލާސްތަކެއް މަޖިލިސް އިދާރާއިން ހިންގުމަކީވެސް މުހިއްމު ކަމެއް ކަމުގައި ބެލެވެ އެވެ.