ޕާކްކުރާނެ ތަން ނުދައްކާ ވެހިކަލްތައް ޓޯކުރާ މައްސަލަައިގައި ކުރަމުންދާ މުޒާހަރާ މިއަދުވެސް ކުރިއަށް އެބަދެ އެވެ.

މިއަދު މުޒާހަރާ ކުރަމުންދަނީ ޓްރާންސްޕޯޓް މިނިސްޓްރީ ހުންނަ ހުޅުމާލެ އުމަރު ޒާހިރު ބިލްޑިން ކުރިމަތީގަ އެވެ.

މަގުމަތީގައި ހުންނަ އެތައް އުޅަނދެއް ފުލުހުން ޓޯ ކުރާ މައްސަލައިގައި ވަަރަށް ގިނަ ޓެކްސީ ޑްރައިވަރުންނާއި ޒުވާނުން ދަނީ ހިތްހަމަނުޖެހުން ފާޅު ކުރަމުންނެވެ. މުޒާހަރާގެ ބައެއް ބައިވެރިން ދަނީ ޓްރާންސްޕޯޓް މިނިސްޓަރު އަމީންގެ އިސްތިއުފާއަށް ވެސް ގޮވަމުންނެވެ.

މުޒާހަރާގެ ބައިވެރިއަކު ބުނި ގޮތުގައި ޕާކްކުރާނެ ގޮތެއް ހޯދާ ނުދީ ވެހިކަލް ޓޯކޮށް އާއްމު ރައްޔިތުން ކާންބޯން ކުރާ މަސައްކަތް ސަރުކާރުން ހުއްޓުވަމުން ދާކަމަށެވެ. މިކަމުގައި ޓްރާންސްޕޯޓް މިނިސްޓްރީން އަމަލުކުރަނީ އެކި މީހުނަށް ތަފާތުކޮށް ކަމަށްވެސް އޭނާ ފާހަގަކުރި އެވެ.

"ގާނޫނު ތަންފީޒުކުރުމުގައި ގެންގުޅުއްވާ ތަފާތު. ކާރަކަށް ވީތީ ޓޯކޮށްފައި، ބައެއް ވެހިކަލް ނުކުރޭ. ވެހިކަލް ރަޖިސްޓްރީ ކުރުމުގައިވެސް ތަފާތުކުރަނީ. އަޅުގަނޑުމެން ރައްޔިތުން މަގުމައްޗަށް ނުކުނަން މިޖެހެނީ މިދިޔަ 8 މަސްތެރޭގައި ރައްޔިތުންނަށް ލިބެމުންދާ ގެއްލުންތަކުގެ ސަބަބުން. މި ތަފާތުކުރުންތައް ހުއްޓާލަންޖެހޭ،" އޭނާ ބުންޏެވެ.

މި މުޒާހަރާތަކަށް ތިން ދުވަސް ވެފައި ވާއިރު، ފާއިތުވި ދެ ރޭވެސް މީހުންވަނީ މިކަމާއި ކަންބޮޑުވުން ފާޅުކޮށް މަގުމަތީގައި މުޒާހަރާކޮށްފަ އެވެ.

ރިޔާސީ އިންތިހާބުގެ ކެމްޕޭން ތެރޭގައި ރައީސް މުއިއްޒު ވިދާޅުވެފައިވަނީ ޕާކް ކުރާނެ ތަނެއް ނުދައްކާ ޕާކިން ސްޓްކާ ނުޖައްސަވާނެ ކަމަށެވެ. ނަމަވެސް ވެރިކަމަށް ވަޑައިގެން ސްޓިކާ ޖެހުމުގެ ބަދަލުގައި ވެހިކަލްތައް ޓޯކުރުން އިންތިހާއަށް އިތުރުވެ، ފެނިގެންދަނީ މިކަން ރައްޔިތުންނަށް ބޮޑު ތަކްލީފަކަށް ވެފައިވާ މަންޒަރެވެ. ސަރުކާރަށް 8 މަސް ވީއިރު މިހާތަނަށް ޕާކިން މައްސަލައަށް އަދި ވެހިކަލް އިތުރުވުމުގެ މައްސަލައަށް ހައްލު ހޯދައިދިނުމަށް އެއްވެސް ކަމެއް ކުރެވިފާނުވެ އެވެ.