އިއްޔެ ކުރި ވިއްސާރައާއި ގުޅިގެން ސަރުކާރު މިއަދު ބަންދުކުރުމުން މާލޭ ސަރަހައްދުގައި ހުރި ސަރުކާރު ހޮސްޕިޓަލުތަކުން ފޯރުކޮށްދޭ އޯޕީޑީ އަދި އެހެނިހެން ކްލިނިކަލް ހިދުމަތްތައް ބަންދުކޮށްފި އެވެ.

އެގޮތުން އޯޕީޑީ އަދި އެހެނިހެން ކްލިނިކަލް ހިދުމަތްތައް ބަންދުކޮށްފައިވަނީ ދަރުމަވަންތަ ހޮސްޕިޓަލާއި، އައިޖީއެމްއެޗް އަދި ވިލިމާލެ ހޮސްޕިޓަލުންނެވެ.

އައިޖީއެމްއެޗް އިން "އެކްސް" ގައި ކުރި ޕޯސްޓެއްގައި ބުނީ މޫސުން ގޯސްވުމާ ގުޅިގެން ރައީސް އޮފީހުން ސަރުކާރު މިއަދު ބަންދު ކުރައްވާފައިވާތީ އެ ހޮސްޕިޓަލުތަކުން ދެއްވަމުން ގެންދާ އޯޕީޑީ ހިދުމަތްތައް ބަންދުވާނެ ކަމަށެވެ.

"އޯގަސްޓު މަހުގެ 14 ވާ ބުދަ ދުވަހަކީ ސަރުކާރު ބަންދު ދުވަހެއް ކަމަށް ރައީސް އޮފީހުން ކަނޑައަޅުއްވާފައިވާތީ ދަރުމަވަންތަ ހޮސްޕިޓަލާއި، އައިޖީއެމްއެޗް އަދި ވިލިމާލެ ހޮސްޕިޓަލުގެ ސްޕެޝަލިސްޓް އޯޕީޑީ އަދި އެހެނިހެން ހިދުމަތްތައް ބަންދުވާނެ" އެ ޕޯސްޓުގައި ބުނެފައިވެ އެވެ.

އޯޕީޑީ އަދި އެހެނިހެން ކްލިނިކަލް ހިދުމަތްތައް ބަންދުކަމުގައި ވިޔަސް އައިޕީޑީ އަދި އިމަޖެންސީ ހިދުމަތްތައް ލިބޭނެ ކަމަށް އައިޖީއެމްއެޗް އިން ބުންޏެވެ.

އައިޖީއެމްއެޗްގެ ސްޕެޝަލިސްޓް ޑޮކްޓަރުންނަށް ދެއްކުމަށް އެޕޮއިންޓްމެންޓް ހެއްދުމަކީ ވަރަށް ދަތި ކަމެކެވެ. އެތައް ދުވަހެއް މަޑު ކުރުމަށްފަހު އެޕޮއިންޓްމެންޓް ހަމަޖެހޭއިރު މިގޮތަށް ކެންސަލް ކުރުމުން ބައެއް އާންމުން ދަނީ ފާޑުކިޔަމުންނެވެ.

މިއަދަކީ ސަރުކާރު ބަންދު ދުވަހެއްގެ ގޮތުގައި ރައީސް އޮފީހުން ކަނޑައަޅާފައިވަނީ ރާއްޖެއަށް މިހާރު ކުރަމުންދާ ވިއްސާރައާ ގުޅިގެންނެވެ.