ބޭނުންކުރެވޭ ރިޒާވް ޖުލައި ނިމުނުއިރު ހުރި މިންވަރަށްވުރެ މިމަހުގެ ނިޔަލަށް އިތުރުވާނެ ކަމަށް އެމްއެމްއޭ އިން މިއަދު ބުނެފި އެވެ.

ދައުލަތުގެ ބޭނުން ކުރެވޭ ޑޮލަރު ރިޒާވު ހުސްވެއްޖެކަމަށް ބުނެ ފަތުރާ ޚަބަރާ ގުޅިގެން މަރުކަޒީ ބޭންކުން ނެރުނު ބަޔާނެއްގައި ވަނީ ރާއްޖޭގެ ރިޒާވްއާ ބެހޭ ގޮތުން މީޑިއާގައި ދައުރުވާ ވާހަކަތަކަކީ ދޮގު ވާހަކަތަކެއް ކަމަށާއި، އެއީ ހަގީގަތާ ޚިލާފު މައުލޫމާތުތަކެއް ކަމަށެވެ.

ރިޒާވްގެ މައުލޫމާތު މިހާރެކޭ އެއްގޮތަށް އެ އޮތޯރިޓީން މަހުން މަހުން ބަރާބަރަށް ޝާއިއުކުރަމުން އަންނަ ކަމަށާއި، ރާއްޖޭގެ ބޭނުންކުރެވޭ ރިޒާވް ޖުލައި ނިމުނުއިރު ހުރި މިންވަރަށް ވުރެ އޮގަސްޓް މަހުގެ ނިޔަލަށް އިތުރުވާނެކަމަށް ލަފާކުރެވޭ ކަމަށް ވެސް ބުނެ އެވެ. އެހެންކަމުން މިފަދަ ކަންތައްތަކާއި ގުޅޭ ޚަބަރުތައް ހަގީގަތާއި ޚިލާފަށް ގެނެސްދިނުމަކީ ނުހަނު ކަންބޮޑުވާ ކަމެއް ކަމަށް ވެސް އެމްއެމްއޭ އިން ބުންޏެވެ.

އެމްއެމްއޭއިން ކުރިން ބުނެފައި ވަނީ ކޮވިޑްގެ ކުރިމަތިވި އިގްތިސާދީ ގޮންޖެހުންތަކާއި ގުޅިގެން އެމްއެމްއޭ އާއި ފިނޭންސް މިނިސްޓްރީއާއެކު 2019 ވަނަ އަހަރު ވެވުނު އެއްބަސްވުމެއްގެ ދަށުން ސޮވެރިން ޑިވެލޮޕްމެންޓް ފަންޑް (އެސްޑީއެފް)އަށް ޖަމާކުރެވޭ ޑޮލަރު އެމްއެމްއޭ އަށް މާރުކުރުމަށްފަހު ބޭނުންކުރެވޭ ރިޒާވްގައި ހިމަނާފައިވާ ކަމަށެވެ. ނަމަވެސް 2023 ވަނަ އަހަރުގެ ޑިސެމްބަރު މަހުން ފެށިގެން ސޮވެރިން ޑިވެލޮޕްމެންޓް ފަންޑަށް ޖަމާވާ ބޭރު ފައިސާ އެމްއެމްއޭއަށް މާރުކުރުމުގެ ބަދަލުގައި ޑޮލަރުން ބެހެއްޓުމަށް ނިންމުނު ކަމަށާއި އެގޮތުން މިހާރު އެސްޑީއެފްގައި ބޭނުންކުރެވޭ ގޮތަށް 65 މިލިއަން ޑޮލަރު ހުރިކަން އެމްއެމްއޭއިން ފާހަގަކުރެ އެވެ.

މިއަހަރުގެ ޖުލައި މަހު ބޭނުންކުރެވޭ ރިޒާވް ހުރި އަދަދަކީ 45 މިލިއަން ޑޮލަރު ކަމަށާއި މިއަދަދު ހިސާބު ކުރުމުގައި އެސްޑީއެފްގައި ހުރި 65 މިލިއަން ޑޮލަރު ނުހިމެނޭ ކަމަށް ވެސް އެމްއެމްއޭ އިން ބުނެ އެވެ.