ކުރީގެ ޕްރޮސިކިއުޓާ ޖެނެރަލް ހުސައިން ޝަމީމަށް ހަމަލާދިން މައްސަލާގައި ހަތް މީހުންގެ މައްޗަށް ދައުވާކޮށްފި އެވެ.

ޕްރޮސެކިއުޓާ ޖެނެރަލްގެ އޮފީހުން ބުނީ ޕްރޮސިކިއުޓާ ޖެނެރަލްގެ މަގާމުގައި ކުރިން ހުންނެވި ހުސައިން ޝަމީމަށް ނުރައްކާތެރި ހަތިޔާރު ބޭނުންކޮށްގެން ހަމަލާދީ ޒަހަމްކޮށްލާފައިވާ މައްސަލާގައި ހަތް މީހެއްގެ މައްޗަށް ދައުވާކުރުމަށް ކްރިމިނަލް ކޯޓަށް ހުށައަޅަފައިވާ ކަމަށެވެ.

މި މައްސަލައިގައި ދައުވާ ކުރަނީ ރ. އަލިފުށި، ރިވެލި، މިދުހަތު އާދަމް، ލ. ގަން، ތުނޑި، ޖަވާހިރުވިލާ، މުހައްމަދު ޖަޒްލާން، ދަފްތަރު ނަންބަރު ދރ 2247، އަހުމަދު މައިސާން ހާޝިމް، ލ. މާމެންދޫ، މުރިނގު، ރަޖުވާން ލަތީފް، ތ. ގާދިއްފުށި، މުސްތަރީގެ، ޝަމާލް ހުސައިން، ތ. ދިޔަމިގިލި، ރުވާ، އަބާން އަބްދުލްހަންނާނު އަދި އދ. މާމިގިލި، ކެމީހިޔާ، ޒަޔާން ނަސީރުގެ މައްޗަށެވެ.

މި މީހުންގެ މައްޗަށް ދައުވާ ކޮށްފައިވަނީ ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ގާާނޫނުގެ ދަށުންނެވެ. މި މީހުންގެ މައްޗަށް ކުރަނީ ނުރައްކާތެރި ހަތިޔާރެއް ބޭނުންކޮށްގެން ޤަސްދުގައި މީހަކު މަރާލަން އުޅުމުގެ ކުށުގެ ދައުވާ އެވެ.

ފުލުހުން ބުނީ މި މައްސަލާއާ ގުޅިގެން ހައްޔަރުކުރި ހަތް މީހުން ތިބީ މިހާރު ވެސް ބަންދުގައި ކަމަށެވެ.