ބޮޑު ދަރަންޏެއް ދައްކަން ޖެހިފައިވާ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ހިއްސާ އާއްމުންނަށް ވިއްކުމަށް މަސައްކަތްކުރަމުން ގެންދަވާ ކަމަށް ސަރުކާރުން ބުނެފި އެވެ.

އެޗްޑީސީގެ ހިއްސާ އާއްމުންނަށް ވިއްކުމަށް ނިންމާފައިވާ އިއުލާންކުރެއްވީ ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ހައުސިން މިނިސްޓަރު ޑރ. އަލީ ހައިދަރު އެވެ.

މިނިސްޓަރު ހައިދަރު ވިދާޅުވީ އެޗްޑީސީގެ ހިއްސާ އާއްމުންނަށް ވިއްކުމަށް ރައީސުލްޖުމްހޫރިއްޔާ ބޭނުންފުޅުވާ ކަމަށެވެ.

"ވަރަށް އުއްމީދީ އެހެން ވާހަކައެއް އަޅުގަނޑު ދަންނަވާލަފާނަން.. މިއަދު އަދި ކެބިނެޓުގައި ނުނިންމެވި ނަމަވެސް ރައީސް ވިސްނަވާފައި އޮތީ އެޗްޑީސީއަކީ އާއްމުންގެ ހިއްސާވެސް އޮންނަ ކުންފުންޏަކަށް ބަދަލުކުރަން،" އޭނާ ވިދާޅުވި އެވެ.

ހުޅުމާލެ ތަރައްގީކުރަން ސަރުކާރުން އެ ކުންފުނި އުފެއްދީ، 2001 ވަނަ އަހަރު އެވެ،

އެޗްޑީސީން ހިންގާފައިވާ ޕްރޮޖެކްޓްތަކުގެ ތެރޭގައި ހުޅުމާލެ، ކުޑަގިރި، އާބަން އައިލް ހިމެނެ އެވެ. މީގެ އިތުރުން ތިލަފުށި، ރަސްމާލެ އަދި ހުޅުމާލެ ފޭސް 3 ތަރައްގީކުރުމުގެ މަސައްކަތް ވެސް ކުންފުނިން އަންނަނީ ކުރަމުންނެވެ.