މާލޭގައި މިދިޔަ ބުރާސްފަތި ދުވަހުގެ ރޭ ވަޅިން ބިރު ދައްކައި އަންހެނަކު ރަހީނުކުރި މައްސަލައިގައި ފުލުހުން ހައްޔަރުކުރި އާދަމް އަތުހަރު ދޫނިދޫ ޖަލު ގޮޅީގައި ދަންޖެހިފައި ހުއްޓާ ފެނުނީ ޖަލު ގޮޅިތަކުގެ ކެމެރާ މޮނިޓަ ކުރަމުން ދަނިކޮށް ކަމަށް ފުލުހުން މިއަދު ބުނެފި އެވެ.

އަތުހަރު ދަންޖެހުމުގެ ސަބަބުން ހާލުދެރަވެ މިހާރު ދަނީ އައިޖީއެމްއެޗް އައިސީޔޫގައި ވެންޓިލޭޓަރުގައި ފަރުވާދެމުންނެވެ.

އަތުހަރު ދަންޖެހުނު ހާދިސާއާ ގުޅޭ ގޮތުން ފުލުހުން މިއަދު އާންމުކުރި ޓައިމްލައިންގައިވާ ގޮތުން އޭނާ ދަންޖެހިފައި ހުއްޓާ ފެނުނީ އިއްޔެ އިރު އޮއްސި 7:02 ގަ އެވެ. ހަމަ އެ ވަގުތު ގޮޅިއަށް ވަދެ އަތުހަރު ނަގައި ބިންމަތީ ބޭއްވި ކަމަށާއި އޭގެ ތިން މިނެޓް ފަހުން ސްޓްރެޗަރުގައި އޭނާ ނެރެގެން އެއް މިނެޓް ތެރޭ ދޫނިދޫ ކްލިނިކަށް ގެންދިޔަ ކަމަށް ވެސް އެ ޓައިމްލައިނުގައިވެ އެވެ.

އަތުހަރު ދަންޖެހުމާއި ގުޅިގެން ފުލުހުން އާންމުކުރި ޓައިމްލައިން

އޭގެ އަށް މިނެޓް ފަހުން 7:14 ވީއިރު އަތުހަތު ލޯންޗެއްގައި މާލެ ގެނައި ކަމަށާއި 7:17 ގައި އެމްބިއުލާންސަށް އަރުވައި 7:25 ވީއިރު އައިޖީއެމްއެޗްގެ އިމަޖެންސީއަށް ގެންދިޔަ ކަމަށް ވެސް ޓައިމްލައިނުން ދައްކަ އެވެ.

އަތުހަރު ދަންޖެހިފައި ހުއްޓާ ފެނުނުއިރުން ފެށިގެން ހޮސްޕިޓަލަށް ގެންދިއުމާ ދެމެދު ހޭދަވީ 23 މިނެޓެވެ.

އަތުހަރު ރަހީނުކޮށްފައި ވަނީ އޭނާ ލޯބީގެ ގޮތުން ގުޅިގެން އުޅުނު އަންހެނެއް ކަމަށް ބައެއް ފަރާތްތަކުން ބުނެފައިވެ އެވެ. އެ ދެމީހުން ދެމެދުގައި ހިނގި ޒުވާބަކަށްފަހު އޭނާ ވަނީ އަންހެން މީހާގެ ކަރުގައި ވަޅި ޖައްސައިގެން ގެއިން ނެރެ ސައިކަލްގައި ދިއުމަށް މަސައްކަތް ކޮށްފަ އެވެ.

ފުލުހުން ވަނީ އަތުހަރުއަށް މުގުރުން ހަމަލާދީ އަންހެން މީހާ ސަލާމަތްކޮށްފަ އެވެ. ސަލާމަތް ކުރަން އުޅުމުގެ ތެރޭގައި ދެމީހުނަށް ވެސް އެކިވަރުގެ އަނިޔާ ލިބުނުވެ.