މި އަހަރުގެ އޭޕްރީލް މަހު ބޭއްވި ރައްޔިތުންގެ މަޖިލީހުގެ އިންތިހާބާ ދިމާކޮށް އާރްޑީސީން 500 އަށްވުރެ ގިނަ މީހުންނަށް ވަޒީފާ ބެހިކަން ހާމަވެއްޖެ އެވެ.

މައުލޫމާތު ހޯދައި ލިބިގަތުމުގެ ގާނޫނުގެ ދަށުން "ހުރިހާ" އިން ހުށަހެޅި އާރްޓީއައި އަށް އާރްޑީސީން ދިން ޖަވާބުގައިވާގޮތުން ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަތްފަހުން ރާއްޖޭގެ އެކި ރަށްރަށުން ޖުމްލަ 247 މުވައްޒަފަކު އެ ކުންފުނީގެ ވަޒީފާއިން ވަކިކޮށްފައިވެ އެވެ. އެންމެ ގިނަ މީހުން ވަޒީފާއިން ވަކިކުރީ މާލެއިންނެވެ.

ދެން އެންމެ ގިނަ މުވައްޒަފުން ވަޒީފާއިން ވަކިކުރީ ގއ. ކޮލަމާފުއްޓާއި ނ. ވެލިދުއާއި ގދ. ތިނަދޫއިންނެވެ. އަދި ގއ. ކޮލަމާފުށިން 18 މީހަކު ވަޒީފާއިން ވަކިކޮށްފައިވާއިރު، ނ. ވެލިދޫ އަދި ތިނަދޫ އިން 15 މުވައްޒަފަކު ވަޒީފާއިން ވަކިކޮށްފައިވެ އެވެ. ހއ. ދިއްދޫން 13 މުވައްޒަފަކު ވަޒީފާއިން ވަކިކޮށްފައިވާއިރު، އދ. މާމިގިލިން 12 މުވައްޒަފަކު ވަޒީފާއިން ވަކިކޮށްފައިވެ އެވެ. ގއ. ވިލިނގިއްޔާއި ނ. ހޮޅުދޫން 11 މީހަކު ވަޒީފާއިން ވަކިކޮށްފައިވާ ކަމަށް އެ ކުންފުނިން ބުންޏެވެ.

މަޖިލިސް އިންތިހާބާ ދިމާކޮށް އެންމެ ގިނައިން ވަޒީފާ ދީފައި ވަނީ މާލެއިންނެވެ. މާލެއިން ޖުމްލަ 172 މީހަކަށް ވަޒީފާ ދީފައިވެ އެވެ. އަތޮޅު ތެރެއިން އެންމެ ގިނައިން ވަޒީފާ ދިނީ ގއ. ވިލިނގިލިންނެވެ. އެއީ 33 މީހުންނަށެވެ. ދެން އެންމެ ގިނައިން ވަޒީފާ ދިނީ ނ. ކެނދިކުޅުދު އާއި ހއ. ދިއްދޫންނެވެ. ކެނދިކުޅުދޫން 27 މީހަކަށް ވަޒީފާ ދީފައިވާއިރު، ދިއްދޫން 26 މީހަކަށް ވަޒީފާ ދީފައިވެ އެވެ.

އާރްޑީސީގެ މުވައްޒަފުންތަކެއް

މީގެ އިތުރުން އއ. ތޮއްޑޫން 19 މީހަކަށް، ގއ. ކޮލަމާފުށިން 16 މީހަކަށް އެއަތޮޅު ގެމަނަފުށިން 18 މީހަކަށް ވަޒީފާ ދީފައިވެ އެވެ.

ރައީސް މުއިއްޒު ވެރިކަމަށް ވަޑައިގަތުމުގެ ކުރިން ވިދާޅުވަމުން ގެންދެވީ އެއްވެސް މުވައްޒަފަކު ވަޒީފާއިން ވަކިނުކުރާނެ ކަމަށެވެ. އަދި ސިޔާސީ މަންފާއަކަށްޓަކައި ވަޒީފާ ނުދޭނެ ކަމަށް ވެސް ވިދާޅުވެފައިވެ އެވެ. ނަމަވެސް ފެންނަނީ އެއާ މުޅިން އިދިކޮޅު އަމަލުތަކެއް ކަމަށް ބުނެ ގިނަ ބައެއްގެ ފާޑުކިޔުން ވަނީ އަމާޒުވެފަ އެވެ.