ޖޭކޭ ރޯލިންގްގެ ފޮތްތަކަށް ބިނާކޮށް ހަދާފައިވާ ހެރީ ޕޮޓާ ފިލްމް ސީރީޒް އިން ޕްރޮފެސަރު މެގްގޮނަގަލްގެ ރޯލުން ގިނަ ބައެއްގެ މަގުބޫލުކަން ހޯދާފައިވާ އިނގިރޭސި އެކްޓްރެސް ޑޭމް މެގީ ސްމިތު އުމުރުން 89 އަހަރުގައި މަރުވެއްޖެ އެވެ.

އޭނާ މަރުވިކަން އާއިލާއިން އިއުލާންކޮށްފައި ވަނީ މިދިޔަ ހުކުރު ދުވަހު އެވެ. މެގީގެ އާއިލާއިން ނެރުނު ބަޔާނެއްގައި ބުނީ މެގީ ސްމިތް މަރުވެފައި ވަނީ ގޭގައި ކަމަށެވެ.

އެކްޓިން ކެރިއަރު 1950 ގައި ފެށި މެގީ ސްމިތު ވަނީ ވަރަށް ގިނަ ކާމިޔާބީތައް ހޯދާފަ އެވެ. އެގޮތުން އެނާއަށް ވަނީ ހަތަރު އެމީ އެވޯޑާއި، ތިން ގޯލްޑަން ގްލޯބް އަދި ދެ އޮސްކާ ވެސް ލިބިފަ އެވެ.

އޭނާގެ ކެރިއަރުގެ އެންމެ ފަހުގެ މަސައްކަތަކީ އިނގިރޭސި ސީރީސް ޑައުންޓަން އެބީ އެވެ.

ހެރީ ޕޮޓާގެ މަސައްކަތަގެ އިތުރުން އޭނާގެ މަސައްކަތް ފާހަގަކޮށްލެވޭ ފިލްމުތަކުގެ ތެރޭގައި "ދަ ޕްރައިމް އޮފް މިސް ޖީން ބްރޯޑީ" "ކެލިފޯނިއާ ސުއީޓް"، "ޓީ ވިތް މުސޮލީނީ" އަދި "ގޮސްފޯޑް ޕާކް" ހިމެނެ އެވެ.

އޭނާ އެންމެ ބޮޑަށް މަޝްހޫރުވެފައިވަނީ ހެރީ ޕޮޓާގެ ޕްރޮޕެސަރު މެގްގޮނަގަލްގެ ރޯލުންނެވެ. ހެރީ ޕޮޓާ ފްރެންޗައިސްގެ 8 ފިލްމުގައި ވެސް އޭނާ ވަނީ މުހިއްމު ރޯލެއް އަދާކޮށްފަ އެވެ.

އެކްޓިިން ލެޖެންޑެއް ގޮތުގައި ބެލެވޭ މެގީ މަރުވުމާ ގުޅިގެން ދުނިޔޭގެ ފިލްމީ ދާއިރާގެ މީހުންނާއި ސިޔާސީ ވެރިން ވެސް ވަނީ އޭނާގެ މަސައްކަތަށް ތައުރީފްކޮށް، ހަނދާން އާކޮށްފަ އެވެ.