އެމެރިކާގެ މަޝްހޫރު ސިޓްކޮމް "ފްރެންޑްސް"އަކީ މިއަދާ ހަމައަށް ވެސް އެންމެ ގިނަ މީހުން ހުއްޓުމެއްނެތި ބަލަމުން އަންނަ އެއް ސީރީޒް އެވެ.

އެގޮތުން ކޮންމެ އަހަރަކު ވެސް އެތައް މިލިއަން ބަޔަކު ފްރެންޑްސް ބަލާއިރު އޭގެ ތެރެއިން ގިނަ ބަޔަކު އެ ސީރީޒް ބަލަމުން އައީ މަޝްހޫރު ސްޓްރީމިން ޕްލެޓްފޯމް ނެޓްފްލިކްސްއިންނެވެ. އޭގެ ތެރޭގައި ގިނަ ދިވެހިން ވެސް ހިމެނެ އެވެ.

އެހެން ނަމަވެސް އެފަދަ ދިވެހިންނަށް އޮތް ހިތާމަވެރި ހަބަރަކީ މި ހިނގާ އޮކްޓޯބަރު މަހަށްފަހު ނެޓްފްލިކްސްއިން "ފްރެންޑްސް" ގެއްލޭނެ ހަބަރެވެ.

އެތައް އަހެރެއް ވަންދެން އެ ސީރީޒްގެ އޮންލައިން ސްޓްރީމިން ރައިޓްސް ނެޓްފްލިކްސްއަށް ލިބިފައި އޮތް ނަމަވެސް މިއަހަރުގެ ނިޔަލަށް އެ ކުންފުންޏަށް އެ ރައިޓްސް ގެއްލޭނެ އެވެ.

އޭގެ ބަދަލުގައި ފްރެންޑްސް އޮންލައިންކޮށް ދެން ސްޓްރީމް ކުރާނީ އެ ސީރީޒްގެ އެއް ޕްރޮޑަކްޝަން ކުންފުނި ވާނާސް ބްރޯސްގެ އަމިއްލަ ސްޓްރީމިން ޕްލެޓްފޯމް "މެކްސް"އިންނެވެ.

އެކި ގައުމުތަކަށް މިހާރުވެސް ނެޓްފްލިކްސް މެދުވެރިކޮށް ފްރެންޑްސް ނުފެންނައިރު ދިވެހި ރާއްޖޭގައި ނެޓްފްލިކްސް މެދުވެރިކޮށް ފްރެންޑްސް ފެންނާނެ އެންމެ ފަހު ތާރީހަކީ 31 އޮކްޓޯބަރު 2024 އެވެ.