އެމެރިކާގެ ފްލޮރިޑާ އަށް އަނެއްކާވެސް ބާރުގަދަ ތޫފާނެއް އަރާނެ ކަމަށް ލަފާކޮށް އެ ސަރަހައްދުތަކަށް ކުއްލި ނުރައްކަލުގެ ހާލަތު އިއުލާންކޮށްފި އެވެ. މި ފަހަރު އިއުލާންކޮށްފައި ވަނީ ހަރިކޭން މިލްޓަންގެ ނަން ދީފައިވާ ތޫފާނެކެވެ.

ހަރިކޭން މިލްޓަންއަކީ ވެސް ކެޓަގަރީ 4 ގެ ތޫފާނެއް ކަމަށް ލަފާ ކުރެވެ އެވެ. މި ތޫފާން ފްލޮރިޑާއަށް އަރާނެ ކަމަށް ލަފާ ކުރެވެނީ ބުދަ ދުވަހު އެވެ.

މިދިޔަ މަހު 26 ވަނަ ދުވަހު ފްލޮރިޑާގެ ބިގް ބެންޑް ސަރަހައްދަށް ކެޓަގަރީ 4 ގެ ތޫފާން ހެލީން އަރާ ވަރަށް ބޮޑެތި ގެއްލުންތަކެއް ވަނީ ވެފަ އެވެ. މި ތޫފާން ވަނީ ފްލޮރިޑާގެ ބިގް ބެންޑް ސަރަހައްދުގެ އިތުރުން އެހެން 5 ސްޓޭޓަކަށް އަރާފަަ އެވެ. އެއީ އެމެރިކާގެ ޖޯޖިއާ، ނޯތް އަދި ސައުތް ކެރޮލީނާ، ވާޖިނިއާ އަދި ޓެެނެސީއަށެވެ. މި ތޫފާނުގެ ސަބަބުން 200 އަށް ވުރެ ގިނަ މީހުންވަނީ މަރުވެފަ އެވެ. އަދި އެތައް ހާސް މީހުންގެ ގެތައް ވަނީ ހަލާކުވެ މަގުމަތިވެފަ އެވެ.

ހެލީންގެ ސަބަބުން ލިބުނު ގެއްލުންތަކަށް އަރައިނުގަނެވި އުޅެނިކޮށް އަނެއްކާވެސް ހަރިކޭން މިލްޓަން އިއުލާންކޮށްފައިވަނީ ފްލޮރިޑާގެ ޓަންޕާ ސަރަހައްދަށެވެ. މި ތޫފާނުން ރައްކާތެރިވުމަށް ގިނަ ބަޔަކު ދަނީ ތައްޔާރުވަމުންނެވެ.