ގާޒާއަށް ހެދިގޮތް ލުބުނާނަށް ހަދާނެކަމުގެ އިންޒާރު އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ދީފި އެވެ.

ނަތަންޔާހޫ މި އިންޒާރު ދީފައިވަނީ އަންގާރަ ދުވަހު ލުބުނާނު މީހުނަށް ހާއްސަކޮށް ތައްޔާރުކޮށްފައިވާ ވީޑިއޯ މެސެޖެއްގަ އެވެ. އެ މެސެޖްގައި އޭނާ ބުނެފައިވަނީ އިޒްރޭލުން ހިޒްބުﷲ ގެ ލީޑަރު ހަސަން ނަސްރުﷲ އަވަހާރަކޮށްލާފައި ވާކަމަށާއި އަދި ނަސްރުﷲ ގެ ބަދަލުގައި ލީޑަރަކަށްވާނެ މީހުންވެސް މަރާލާފައިވާނެ ކަމަށެވެ.

މީގެ އިތުރުން ނަތަންޔާހޫ ބުނީ ހިޒުބުﷲ ކުރިއަށްވުރެ މާ ނިކަމެތިވެ ބަލިކަށިވެފައިވާ ކަމަށެވެ.

އިޒްރޭލުން މިހަފްތާ ތެރޭގައި ވަނީ ހިޒްބުﷲ ގެ ލީޑަރަށް ވާނެކަމަށް ބެލެވުނު ހާޝިމް ސާފިއްދީން ވައިގެ ހަމަލާއެއްގައި މަރާލާފައިވާ ކަމަށް ބުނެފަ އެވެ. މިކަމާ ގުޅޭގޮތުން ހިޒްބުﷲ އިން މިހާތަނަށް އެއްޗެއް ބުނެފައިނުވެ އެވެ. ހިޒްބުﷲ އަށް ހާޝިމްގެ ހަބަރެއް ނުވާކަމަށް އަލްޖަރީގެ މަސްދަރުތަކުން ރިޕޯޓްކޮށްފައިވެ އެވެ.

އިޒްރޭލުން ފަލަސްތީނުގެ ގާޒާއަށް ފާއިތުވި އެއްއަހަރު ދުވަހު ހުއްޓުމެއްނެތި ދިން ހަމަލާތަކުގައި މުޅި ގާޒާ ސުންނާފަތިކޮށް، 41،965 މީހުން ޝަހީދުކޮށްލާފައިވެ އެވެ. މީގެ އިތުރުން ގާޒާގެ 2.3 މިލިއަން މީހުންގެ ގެދޮރު ގެއްލިފައިވާކަމަށްވެސް އެ ގައުމުން ހާމަކޮށްފައިވެ އެވެ.

ނަތަންޔާހޫ މި އިންޒާރު ދީފައި މިވަނީ، ލުބުނާނަށް އިޒްރޭލުގެ އިތުރު ހަނގުރާމަ ވެރިންނާއި ހަތިޔާރު ފޮނުވުމަށް އެންގުމަށްފަހު އެވެ. ލުބުނާނުގެ ދެކުނު އައްސޭރިފަށުގެ ސަރަހައްދުތަކާއި، ވެރިރަށް ބޭރޫތުގެ ދެކުނުގެ އަވަށްތަކުގެ ސަރަހައްދުތައް ހުސްކުރުމަށް އިޒްރޭލުން ދަނީ އިންޒާރު ދެމުންނެވެ.

ހިޒްބުﷲ އިން ވަނީ 2023 ވަނަ އަހަރުގެ އޮކްޓޯބަރު މަހުން ފެށިގެން ފަލަސްތީނުގެ ދިފާއުގައި ބޯޑަރު ސަރަހައްދުގައި އިޒްރޭލަށް އެކި ފަހަރުމަތިން ހަމަލާ ދީފަ އެވެ. އިޒްރޭލުން ލުބުނާނަށް ހަމަލާދޭން ފެށީ މިދިޔަ މަހުގެ 23 ވަނަ ދުވަހު އެވެ. ފާއިތުވި ހަފްތާ ތެރޭގައި ހިޒްބުﷲ އިން ވަނީ އިޒްރޭލުގެ ބަނދަރު ސިޓީ ކަމަށްވާ ހައިފާއަށް ރޮކެޓް ހަމަލާތަކެއް ދީފަ އެވެ.

ލުބުނާނަށް އިޒްރޭލުން ދެމުންދާ ހަމަލާތަކުގައި މިހާތަނަށް 2000 އަށް ވުރެ ގިނަ މީހުން ވަނީ ޝަހީދުކޮށްލާފަ އެވެ.