އެޗްޑީސީން ރައްޔިތުންނަށް ދޭ ހިދުމަތެއް ނެތްކަމަށް ބުނެ ހުޅުމާލެ އުތުރު ދާއިރާގެ ޕީއެންސީ މެންބަރު ހުސައިން ޝަރީފް (ހުސެންބެ) ސަރުކާރަށް ފާޑުކިޔައިފި އެވެ.

ހުސެން ޝަރީފް މިއަދު ހެނދުނު އެކްސްގައި ކުރެއްވި ޕޯސްޓެއްގައ ވިދާޅުވީ އެޗްޑީސީއަކީ "މަތިބަރު ބޮޑު" ކުންފުންޏެއް ކަމަށާއި އެ ކުންފުނިން ރައްޔިތުންނަށް ކޮށްދެނީ ކޮން ހިދުމަތެއްތޯ އޭނަ ވަނީ ސުވާލުކުރައްވާފަ އެވެ.

ހުސެންގެ ޕޯސްޓުގައި އޭނާ ވަނީ އާންމުންގެ މީހަކު އެޗްޑީސީއާ ގުޅޭ ގޮތުން ކަންބޮޑުވުން ފާޅުކޮށް ފޮނުވާފައިވާ މެސެޖެއްގެ ސްކްރީންޝޮޓެއް ހިއްސާކުރައްވާފަ އެވެ. އެ މެސެޖްގައި ވަނީ ހުޅުމާލެ ފޭސް ދެއެއްގެ މަގުތަކުގައި މަގުބަތި ނެތުމުން އެކަމާއި ކަންބޮޑުވުން ފާޅުކޮށްފަ އެވެ.

އޭގެ ކުރިން މެންބަރު ހުސެން މިއަދުގެ ވަގުތެއްގައި ވަނީ އިތުރު ޕޯސްޓެއް ކުރައްވާފަ އެވެ. އެ ޕޯސްޓްގައި ވަނީ ހުޅުމާލެ ރައްޔިތުންގެ ހެދިކާކޮޅު ވިއްކޭނެ ގޮތެއް ނެތް ކަމަށް ވިދާޅުވެ އެޗްޑީސީ ޓެގް ކުރައްވާފަ އެވެ.

ހުސެންގެ މި ނުރުހުމުގެ ޕޯސްޓްތަކާއެކު އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދު ވަނީ އެކަމަށް ރައްދު ދެއްވާ އެކްސްގައި ޕޯސްޓްތަކެއް ހިއްސާކުރައްވާފަ އެވެ.

އެގޮތުން ފަޒުލް ވިދާޅުވީ ހުޅުމާލެ ޑިވަލޮޕްމަންޓް ހުއްޓުމެއްނެތި ދަނީ ކުރިއަށް ކަމަށާއި ކުރަން ހުރި މަސައްކަތް އަދި ނުކުރެވި ހުރި މަސައްކަތް ހުންނާނެކަން ގަބޫލުކުރަން ވާނެކަމުގައި ދެކޭކަމަށެވެ.

މީގެ އިތުރުންވެސް ފަޒުލް ވަނީ އެކްސްގައި މިކަމާ ގުޅިގެން ދެ ޕޯސްޓެއް ކުރައްވާފަ އެވެ. ހުޅުމާލެ ފޭސް ދެއެއްގެ މަގުތަށް އަނދިރި މައްސަލައިގައި ވިދާޅުވީ މަގުބައްތި ދިއްލުމަށް ބޭނުންވާ ކަރަންޓް ވިއުގަ އޮގަސްޓް މަހުގެ ނިޔަލަށް ނިމުނުނަމަވެސް، މަގުބައްތި ތަކަށް އަޅާފައިވާ ކޭބަލްތައް ގެއްލިފައިވާކަމަށެވެ.

ތިންވަނަށް އަށް ކުރެއްވި ޕޯސްޓްގައި ވަނީ ހުޅުމާލެ ރައްޔިތުން ހެދިކާ ވިއްކަން ތައްޔާރުކޮށްފައިވާ ހަޓް ތަކުގެ ފޮޓޯއެއް ހިއްސާކުރައްވާ "ރީތި ދޯ" އޭ ވިދާޅުވެފަ އެވެ.

ސަރުކާރާމެދު މެންބަރު ހުސެން ޝަރީފުގެ ނުރުހުން މިއަދު ފާޅުކޮށްފައިވާއިރު، ވެލިދޫ ދާއިރާގެ މެންބަރު މުހައްމަދު އައްބާސް ވެސް ވަނީ ސަރުކާރަށް ވަރަށް ބޮޑަށް ފާޑުކިޔާފަ އެވެ.

ސަރުކާރު މެންބަރުން ސަރުކާރަށް ފާޑުކިޔަން ފަށާފައިމިވަނީ ރައީސް މުހައްމަދު މުއިއްޒު އާއި މަޖިލިސް ރައީސް އަބްދުއްރަހީމް އަބްދުﷲ އާއި ދެބޭފުޅުންގެ ފެކްޝަނެއް ޕީއެންސީގައި ހެދިފައިވާކަމަށް އަޑުތައް ގަދަވެފައިވާ ދަނޑިވަޅެއްގަ އެވެ. ބައެއް ފަރާތްތަކުން ދަނީ އަބްދުއްރަހީމް ރައީސް މުއިއްޒުގެ ސަރުކާރާ ދެކޮޅަށް މަސައްކަތް ކުރާކަމަށް ތުހުމަތުވެސް ކުރަމުންނެވެ.