މާލެ ސަރަހައްދުގައި ޓްރެފިކް މައްސަލައަށް ލުޔެއް ގެނައުމަށްޓަކައި ކުނި އުކާލާ ގަޑިތަކަށް ބަދަލު ގެނައުމަށް ޓްރާންސްޕޯޓް މިނިސްޓްރީއިން ނިންމައިފި އެވެ.

އެ މިނިސްޓްރީން ބުނީ މާލެފަހި ޕްރޮގްރާމުގެ ދަށުން ކުނި އުކާލަ ވަގުތު ރޭގަނޑު 10:00 އިން ފެށިގެން ފަތިހު 5:00 އަށް ބަދަލުކޮށްފައިވާ ކަމަށެވެ. މާލޭގައި މިހާރު ވެމްކޯއިން ކުނި އުކާލުމުގެ މަސައްކަތްކުރަނީ ހަވީރު އަދި އިރުއޮއްސޭ ވަގުތު އެވެ.

ޓްރާންސްޕޯޓް މިނިސްޓްރީން ބުނީ މާލޭގެ މަގުތަކުގައި ދުވާލުގެ ވަގުތުތަކުގައި ދުއްވާ އުޅަނދުފަހަރުގެ އަދަދު އިތުރުވެފައިވާތީ ކުނި އުކާލުމުގެ މަސައްކަތް ރޭގަނޑުގެ ވަގުތަށް ބަދަލުކޮށްފައިވަނީ ތޮށްޖެހުން ކުޑަކުރުމަށެވެ. އަދި މި ބަދަލަކީ ތޮށްޖެހުން ކުޑަ ކުރުމަށް އެންމެ އެކަށީގެންވާ ބަދަލު ކަމުގައި ވެސް އެ މިނިސްޓްރީން ބުނެ އެވެ.

މި ބަދަލު ގެނައުމުގައި އެންވަޔަރަންމަންޓް މިނިސްޓްރީއާއި، މާލެ ސިޓީ ކައުންސިލް އަދި ވޭސްޓް މެނޭޖްމަންޓް ކޯޕަރޭޝަން (ވެމްކޯ) ފަދަ މުއައްސަސާތައް ބައިވެރިވާނެ އެވެ.

މީގެ އިތުރުން ޓް ޓްރެފިކް މައްސަލައަށް ލުއި ގެނައުމުގެ ގޮތުން ބޮޑެތި އުޅަނދުފަހަރުތައް މުދާ އުފުލާ ގަޑިތައް ވެސް ބަދަލުކުރުމަށް މިނިސްޓްރީން ވަނީ ނިންމާފަ އެވެ. އެގޮތުން އެ އުޅަނދުތަކަށް ރޭގަނޑު 8:00 އިން ފަތިހު 5:00 އަށް މުދާ އުފުލޭ ގޮތަށް އުސޫލު ބަދަލުކުރަން ވަނީ ނިންމާފަ އެވެ.