ހިޒްބުﷲއިން ދިން ޑްރޯން ހަމަލާއެއްގައި ޔަހޫދީ ސިފައިންގެ ހަތަރު މީހަކު މަރުވެއްޖެ އެވެ.

އިޒްރޭލު އަސްކަރިއްޔާއިން ބުނީ ހިޒްބުﷲ އިން އިއްޔެ ދިން ޑްރޯން ހަމަލާގައި އެ އަސްކަރިއްޔާގެ ހަތަރު މީހަކު މަރުވެ، ހަތް މީހަކު ވަރަށް ބޮޑަށް ޒަހަމްވެފައިވާ ކަމަށެވެ. ހިޒްބުﷲ ގެ މި ހަމަލާ އަމާޒުކޮށްފައިވަނީ އިޒްރޭލުގެ އުތުރުގައި ހުންނަ އަސްކަރީ ޕޯސްޓަކަށެވެ.

މި ހަމަލާގައި ފަސްދޮޅަހަށްވުރެ ގިނަ މީހުން ޒަހަމްވެފައިވާ ކަމަށްވެސް އިޒްރޭލުން ބުނެ އެވެ. ހިޒްބުﷲ އިން މި ހަމަލާގެ ޒިންމާ ނަގާފައިވާއިރު، ބުނެފައިވަނީ އިޒްރޭލުން ލުބުނާނަށް ހަމަލާދޭހާ ހިނދަކު މިފަދަ އިތުރު ހަމަލާތައް ދޭނެކަމަށެވެ.

އިޒްރޭލުން ލުބުނާނާއި ޣައްޒާއަށް ހަމަލާ ދެމުންދާއިރު، އާދިއްތަ ދުވަހުވެސް ވަނީ ޣައްޒާގެ ގެދޮރުގެއްލިފައިވާ މީހުން ދިރިއުޅެމުން ދިޔަ ސުކޫލަކަށް ހަމަލާދީފަ އެވެ. އެ ހަމަލާގައި 18 މީހުން ޝަހީދުވެ އެތައްބަޔަކު ވަނީ ޒަހަމްވެފަ އެވެ.

އިޒްރޭލުން ހަމަލާ ދީފައިވަނީ ޣައްޒާގެ މެދުތެރޭގައި އޮންނަ ނުސޭރަތުގައި ހުންނަ ސުކޫލަކަށެވެ. އިޒްރޭލުން ވަނީ އެތަނުގެ ގޭޓް ހަލާކުކޮށް ޓޭންކްގައި އެތަނަށް ވަދެގަނެ ހަމަލާދީފަ އެވެ.

މިދިޔަ އަހަރުގެ އޮކްޓޯބަރު މަހުން ފެށިގެން ހިޒްބުﷲއިން ދަނީ އިޒްރޭލަށް އަމާޒުކޮށް ހަމަލާތައް ދެމުންނެވެ. ބަދަލު ހަމަލާތަކާއެކު ހަނގުރާމަ ވަރުގަދަވެފައިވަނީ އިޒްރޭލުން ނިމިދިޔަ ސެޕްޓެމްބަރު މަހު ލުބުނާނަށް ގިނަ ހަމަލާތަކެއް ދޭންފެށުމާއި ގުޅިގެންނެވެ.