ރާއްޖޭގެ ދެކުނުގެ އަތޮޅުތަކުގެ ފަތުރުވެރިކަން ކުރިއެރުވުމަށްޓަކައި "ސަދަން މޯލްޑިވްސް ޓޫރިޒަމް އެސޯސިއޭޝަން" (އެސްއެމްޓީއޭ) ގެ ނަމުގައި އާ އެސޯސިއޭޝަނެއް އުފައްދައިފި އެވެ.

މި ޖަމްއިއްޔާގެ މަޤްސަދަކީ ދެކުނުގެ އަތޮޅުތައް ފާހަގަކޮށްލެވޭ ފަތުރުވެރި މަންޒިލަކަށް ހެދުންކަމަށް އެސްއެމްޓީއޭއިން ބުނެ އެވެ.

އެސްއެމްޓީއޭއިން ރާވާފައިވާ މަސައްކަތްތަކުގެ ތެރޭގައި ސަރުކާރާއި ރަށު ކައުންސިލްތަކާ ގުޅިގެން މަސައްކަތްކުރުމާއި، ސަގާފީ އަދި ގުދުރަތީ ތަރިކަ ކުރިއެރުވުމާއި، މާކެޓިން ކެމްޕޭންތައް ހިންގުން ހިމެނެ އެވެ.

ބައިނަލްއަގްވާމީ ވައިގެ ދަތުރުތައް ފެށުމާއި، ފުރިހަމަ ދަތުރުފަތުރުގެ ނިޒާމެއް ޤާއިމްކުރުމަށްވެސް އެ އެސޯސިއޭޝަނުން ރާވާފައިވެ އެވެ. މީގެ އިތުރުން ފަތުރުވެރިކަމުގެ ދާއިރާގައި އެއްބާރުލުން އިތުރުކޮށް، ހިދުމަތުގެ ފެންވަރު ރަނގަޅުކުރުމަށް ތަމްރީނު ދިނުންވެސް ހިމެނެ އެވެ.

އެސްއެމްޓީއޭއިން ދެމެހެއްޓެނިވި ފަތުރުވެރިކަން ކުރިއެރުވުމަށް މަސައްކަތްތަކެއް ކުރާނެކަމަށާއި މި މަސައްކަތްތަކުގެ ތެރޭގައި ތިމާވެށި ހިމާޔަތްކުރުމާއި، ތިމާވެއްޓާ ރައްޓެހި އާދަތައް ދިރުވާ އާލާކުރުން ހިމެނޭކަމަށް އެ އެސޯސިއޭޝަނުން ބުނެ އެވެ.

ދެކުނު އަތޮޅުތަކުގައި ވަޒީފާގެ ފުރުސަތު އިތުރުކުރުމާއި، ފަތުރުވެރިކަމުގެ ދާއިރާއަށް ބޭނުންވާ ހުނަރު ދަސްކޮށްދިނުމަށްވެސް ރާވާފައިވެ އެވެ. މީގެއިތުރުން، ޑިޖިޓަލް ޓެކްނޮލޮޖީ ބޭނުންކޮށްގެން ރަށްފުށުގެ ފަތުރުވެރިކަމުގެ ހިދުމަތްތައް ހަރުދަނާކުރުމަށްވެސް މަސައްކަތްކުރާނެކަމަށް އެސްއެމްޓީއޭއިން ބުނެފައިވެ އެވެ.

އެސްއެމްޓީއޭ އުފެދިގެން ދިއުމަކީ ދެކުނުގެ ފަތުރުވެރިކަމުގެ މުހިންމު ބާބެއް ފެށިގެން ދިއުން ކަމަށާއި މިއީ ރާއްޖޭގެ ކުރިއަރަމުންދާ ފަތުރުވެރިކަމުގެ ސިނާއަތުގައި މުހިންމު ދައުރެއް އަދާކުރާ ބަޔަކަށްވުމަށް ދެކުނުގެ ރައްޔިތުންކުރާ މަސައްކަތުގެ ފެށުން ކަމަށް އެ އެސޯސިއޭޝަނުން ބުނެ އެވެ.