ހެނދުނު ހޭލާއިރު އަތް ނުވަތަ އިނގިލިތައް އައްސިވެ، ވާގިނެތްފަދަ އިހުސާސެއް މީގެ ކުރިން ކޮންމެ މީހަކަށްވެސް ކުރެވިފައި އޮވެދާނެ އެވެ.

ގިނަ ފަހަރަށް މިއީ ނިދުމުގެ ތެރޭގައި އަތަށް ބާރުބޮޑުވާ ގޮތަށް ނިދުމުން، ނާރުތަކަށް ފިތިގެން ދިމާވާ އާދައިގެ ކަމެކެވެ. ނަމަވެސް، މިއީ ބައެއް ހާލަތްތަކުގައި ސީރިއަސް ސިއްހީ މައްސަލައެއްގެ ނިޝާނަކަށްވެސް ވެދާނެ އެވެ.

ސިއްހީ ތަޖުރިބާކާރުން ފާހަގަ ކުރައްވާ ގޮތުގައި، އަތް އައްސިވުން އާދައިގެ ކަމަކުން ސީރިއަސް މައްސަލައަކަށް ބަދަލުވާ ހާލަތްތަކާއި އޭގެ ސަބަބުތައް ދެނެގަތުން މުހިންމެވެ.

އާދައިގެ ސަބަބުތައް:

  • ނާރުތައް ފިތުން: ނިދާއިރު ބޮލުގެ ދަށަށް އަތްލައިގެން ނިދުމުން ނުވަތަ އަތުގެ މައްޗަށް ބާރުބޮޑުވާ ގޮތަށް އޮތުމުން، އަތުގެ މައި ނާރުތަކަށް ފިތި ވަގުތީ ގޮތުން އައްސިވެ އެވެ. މިފަދަ ހާލަތްތަކުގައި އަތް ހަރަކާތް ކޮށްލުމުން މަދު މިނެޓުކޮޅެއްގެ ތެރޭގައި ރަނގަޅުވެ އެވެ.
  • ކާޕަލް ޓަނަލް ސިންޑްރޯމް: "ކާޕަލް ޓަނަލް" ނާރަށް ބާރުބޮޑުވުމުގެ ސަބަބުން، ހާއްސަކޮށް ބޮޑުވައިންގިއްޔާއި ޝަހާދަތް އިންގިލި އައްސިވާ ގޮތްވެ އެވެ.

ސީރިއަސް ސިއްހީ މައްސަލައަކަށް ވެދާނެ ހާލަތްތައް:

  1. ސްޓްރޯކެއްގެ އަލާމާތަކަށް ވުން: އަތް އައްސިވުމާއެކު، މޫނުމަތިން އެއްފަރާތް ވާގިނެތުން، ވާހަކަ ދައްކަން އުނދަގޫވުން، ނުވަތަ ލޮލުގެ ފެނުމަށް ބަދަލު އައުން ފަދަ ކަމެއް ދިމާވާނަމަ، މިއީ ސްޓްރޯކެއްގެ އަލާމާތަކަށް ވެދާނެ އެވެ. މިއީ ވަގުތުން ކުއްލި ސިއްހީ އެހީތެރިކަން ހޯދަންޖެހޭ ހާލަތެކެވެ.
  2. ހަކުރުބަލި ނުވަތަ "ޕެރިފަރަލް ނިއުރޯޕަތީ": ލޭގައި ހަކުރު ހުންނަ މިންވަރު މަތިކޮށް ހުރުމުގެ ސަބަބުން ނާރުތަކަށް ގެއްލުންވެ، ދެއަތާއި ދެފައި އައްސިވުމުގެ މައްސަލަ ދިމާވެ އެވެ.
  3. ވިޓަމިން ބީ12 މަދުވުން: ހަށިގަނޑުގައި ވިޓަމިން ބީ12ގެ މިންވަރު ދަށްވުމަކީ ނާރުތަކުގެ މަސައްކަތަށް ބުރޫއަރައި، އަތްފައި އައްސިވާ މައިގަނޑު އެއް ސަބަބެވެ.

ޑޮކްޓަރަށް ދައްކަންޖެހޭނީ ކޮން އިރަކު؟

އަތް އައްސިވުމުގެ މައްސަލައަކީ ގަވާއިދުން ދިމާވާ ކަމެއްނަމަ ނުވަތަ އައްސިކަން މާ ގިނައިރު ދެމިގެންދާނަމަ، ނުވަތަ އަތުގެ ބާރު ދެރަވެ އެއްޗެހި ހިފަހައްޓަން އުނދަގޫވާނަމަ ލަސްނުކޮށް ސިއްހީ ތަޖުރިބާކާރެއްގެ އިރުޝާދު ހޯދަން ޖެހޭނެ އެވެ.