އަވަށްޓެރި ސްރީ ލަންކާގެ ފަތުރުވެރިންގެ މަންޒިލެއް ކަމަށްވާ އަރުގަމް ބޭ ސަރަހައްދަށް ޓެރަރިސްޓް ހަމަލާއެއް ދޭން އުޅުމުގެ ތުހުމަތުގައި މިއަދު ދެމީހަކު ހައްޔަރުކުރި އިރު، އޭގެ ތެރޭގައި ދިވެއްސެއްގެ ދަރިއަކު ހިމެނިއްޖެ އެވެ.

އެ ހަމަލާ ދޭން އުޅުނު ކަމުގެ ތުހުމަތުގައި، ލަންކާގެ ޓެރަރިޒަމް އިންވެސްޓިގޭޝަން ޑިވިޝަން (ޓީއައިޑީ) އިން މިއަދު ވަނީ ދެ މީހަކު ހައްޔަރުކުރިކަމަށާއި އެއީ ލަންކާގެ ދެމީހުންކަމަށް އެ ގައުމުގެ ނޫސްތަކުން ރިޕޯޓްކޮށްފައިވެ އެވެ.

ތުހުމަތުކުރެވޭ ދެމީހުންގެ މައުލޫމާތު ލަންކާގެ ޓީއައިޑީއާ ހިއްސާކުރީ އިންޑިއާގެ އިންޓެލިޖެންސް އެޖެންސީން ކަމަށް ވެސް ރިޕޯޓްތައް ބުންޏެވެ.

މިކަމުގެ ހިމެނޭ ދެމީހުންގެ ތެރެއިން އެކަކީ ދިވެހި ފިރިހެނެއްގެ ދަރިއެއްކަން ވަނީ އެނގިފަ އެވެ. ނަމަވެސް އޭނާ އެއްވެސް އިރެއްގައި ރާއްޖެ އައިސްފައިނުވާއިރު، ރާއްޖޭ ރައްޔިތެއްގެ ގޮތުގައި ރަޖިސްޓްރީކޮށްފައި ވެސް ނުވެ އެވެ. އޭނާގެ މަންމަ އާއި ބައްޕަ ވަކިވެ ވަރަށް ކުރިން ފެށިގެން އޭނާގެ ބައްޕަ އުޅެނީ ރާއްޖޭގަ އެވެ.

އަރުގަމް ބޭ ސަރަހައްދަށް ހަމަލާދޭން އުޅޭކަމުގެ އިންޓަލިޖެންސް މައުލޫމާތު ލިބިފައިވާކަމަށް ހާމަކުރީ އިއްޔެގެ ވަގުތެއްގައި ލަންކާގައި ހުންނަ އެމެރިކާ އެންބަސީން އެމެރިކާ ރައްޔިތުންނަށް ނެރުނު ޓްރެވަލް އެޑްވައިޒަރީ އެލާޓެއްގަ އެވެ.

މިހާރު އެ ސަރަހައްދުގައި ސަލާމަތީ ކަންކަން ވަރުގަދަކޮށްފައިވާއިރު، އެ ގައުމުގެ ފުލުހުން ބުނީ ހަމަލާދޭން ރާވާފައިވަނީ އެ ސަރަހައްދުގައި އިޒްރޭލު ބަޔަކު ހިންގާ "ޗަބާދް ހައުސް" ކިޔާ ތަނަކަށް ކަމަށެވެ. މުސްލިމުން ގިނަ އަރުގަމް ބޭ ސަރަހައްދުގައި، ޗަބަދް ހައުސްއަށް ދާ އިޒްރޭލް ޓޫރިސްޓުންނާއި މުސްލިމުންނާ ދެމެދު މި ފަހުން ކުރިމަތިލުންތައް ހިނގާފައިވާ ކަމަށް ލަންކާ ފުލުހުން ބުނެ އެވެ.