ސަރުކާރުން އިއުލާން ކޮށްފައިވާ މާލީ އިސްލާހީ ފިޔަވަޅުތަކުގެ ތެރެއިން ހަރަދު ކުޑަކުރުމަށް، ސިޔާސީ މަގާމުތަކުގައި ތިއްބެވި ބޭފުޅުންގެ ތެރެއިން އިއްޔެގެ ނިޔަލަށް 248 ސިޔާސީ މުވައްޒަފުން ވަކިކޮށްފައިވާ ކަމަށް ރައީސް އޮފީހުގެ ތަރުޖަމާނު ހީނާ ވަލީދު މިއަދު ވިދާޅުވެއްޖެ އެވެ.

މިދިޔަ އޮކްޓޫބަރު މަހުގެ 15 ވަނަ ދުވަހު ރައީސް މުހައްމަދު މުއިއްޒު ވަނީ މާލީ އިސްލާހީ ފިޔަވަޅުތަކުގެ ދަށުން ދައުލަތުގެ ހަރަދު ކުޑަކުރުމަށް، ސިޔާސީ މަގާމުތަކުގައި ތިއްބެވި ބޭފުޅުންގެ ތެރެއިން 228 މުވައްޒަފުން ދެ ހަފްތާ ތެރޭ ވަކިކުރައްވަން ނިންމެވިކަން އިއުލާން ކުރައްވާފަ އެވެ.

މިކަމާ ގުޅޭގޮތުން ހީނާ އިތުރަށް ވިދާޅުވީ ސިޔާސީ މުވައްޒަފުންގެ މަސައްކަތުގެ ފެންވަރު ބެލުމަށް އެ މުވައްޒަފުންގެ ޕާފޯމަންސް ބަލާނެ ނިޒާމެއް ގާއިމް ކުރަން ކެބިނެޓުން ނިންމާފައިވާ ކަމަށާއި އަދި މި ނިޒާމަށް ވަރަށް އަވަހަށް އަމަލު ކުރަން ފަށާނެކަމަށެވެ.

ސިޔާސީ މުވައްޒަފުންގެ އަދަދާއި ތަފްސީލު މި ސަރުކާރުން ވަނީ ސިއްރުކޮށްފަ އެވެ. ސަރުކާރުން ސިޔާސީ ބައެއް މުވައްޒަފުން ވަކިކޮށްފައިވާކަމަށް ބުނެފައިވާއިރު، ފާއިތުވި ދެތިން ހަފްތާ ތެރޭގައިވެސް ސަރުކާރަށް ސިޔާސީ މަގާމުތަކަށް އެކި ބޭފުޅުން އައްޔަންކޮށްފައިވާކަން އެކި އަމިއްލަ ފަރުދުންގެ ސޯޝަލް މީޑިއާ ޕޯސްޓްތަކުން އެނގިފައިވެ އެވެ. އަދި ސިޔާސީ މަގާމުން ވަކި ކުރާ ފަރާތްތަކަށް ސަރުކާރުގެ ކުންފުނިތަކުން ވަޒީފާ ހަމަޖައްސާ ދޭނެކަމުގެ ޔަގީންކަން ރައީސް އޮފީހުން ދެމުންދާކަމަށްވެސް ބައެއް ފަރާތްތަކުން ބުނެފައިވެ އެވެ.