ދިރާސީ އާ އަހަރުގެ ކިޔެވުން ފެށުން އަންނަ އަހަރުގެ އޭޕްރިލް ހައެއްގައި ފަށާ ގޮތަށް ހަމަޖައްސައި 2025 ވަނަ އަހަރުގެ އެކަޑެމިކް ކަލަންޑަރު ނެރެފި އެވެ.

ނިމިދިޔަ ދައުރުގައި ދިރާސީ އަހަރު ފެށުމާއި ޗުއްޓީއަށް ގެނައި ބަދަލުތައް ކުރިން އޮތްގޮތަށް ބަދަލުކުރާނެކަމަށް މި ސަރުކާރުން ބުނެފައިވެ އެވެ. އެގޮތުން ދިރާސީ އާ އަހަރު ފެށޭ ދުވަހާއި ބޮޑު ޗުއްޓީގެ ދުވަސްވަރު ބަދަލުކުރަން ސަރުކާރުން ވަނީ ނިންމާފަ އެވެ.

އިއްޔެ އާއްމުކުރި އެޑިއުކޭޝަން މިނިސްޓްރީން ނެރެފައިވާ އެކަޑެމިކް ކަލަންޑަރުގައިވާ ގޮތުން ފުރަތަމަ ޓާމް ކުރިއަށް ދާނީ 6 އޭޕްރީލް އިން 24 ޖުލައިއަށެވެ.

އެގޮތުން ފުރަތަމަ ޓާމް ޓެސްޓް އޮންނާނީ ޖުލައި 5 އިން 19 އަށް ކަމަށާއި އަދި ދެވަނަ ޓާމްގެ ކިޔެވުން 10 އޯގަސްޓުގައި ފަށައި ނިންމާނީ 25 ޑިސެމްބަރުގައި ކަމަށް ކަލަންޑަރުގައިވެ އެވެ.

މިއާއެކު 2025ގެ ބޮޑު ޗުއްޓީ ކުރިއެކޭ އެއްގޮތަށް ލިބޭނީ ޑިސެމްބަރު މަހު އެވެ. މި ބަދަލާއެކު 2026 އިން ފެށިގެން، ރައީސް މުއިއްޒުގެ ވައުދާ އެއްގޮތަށް، ދިރާސީ އާ އަހަރު ފަށާނީ ޖެނުއަރީގަ އެވެ.

ކަލަންޑަރުގައިވާ ގޮތުން 2026 ވަނަ އަހަރުގެ ދިރާސީ އާ އަހަރު ފަށަނީ މަސް ދުވަހުގެ ޗުއްޓީއަކަށް ފަހު 27 ޖެނުއަރީގަ އެވެ.