ނަސްރުގެ ދުވަހުގެ ސިފައިންގެ މައުރަޒު 2024 ރައީސް މުހައްމަދު މުއިއްޒު ހުޅުވައިދެއްވައިފި އެވެ.

މި މައުރަޒަކީ 3 ނޮވެމްބަރު 1988ގައި ރާއްޖެއަށް ކުރިމަތިވި އުދުވާނީ ހަމަލާގައި ލިބުނު ގެއްލުންތަކާއި އެ ދުވަހު ނަސްރު ހޯދުމަށް ސިފައިން ދެއްކި ހިތްވަރު ދައްކުވައިދޭ މައުރަޒެކެވެ.

މައުރަޒުގައި 200 އަށްވުރެ ގިނަ ޑިސްޕްލޭ ހުރިއިރު، އޭގެތެރޭގައި ފޮޓޯގެ އިތުރުން ނަސްރުގެ ދުވަހު ބޭނުން ކުރި ބައެއް އަސްލު ހަތިޔާރުވެސް ވަނީ ދައްކާލަން ބަހައްޓާފަ އެވެ.

ނަސްރުގެ ދުވަހުގެ ސިފައިންގެ މައުރަޒު 2024 ނައިބު ރައީސް ހުސައިން މުހައްމަދު ލަތީފު ބައްލަވާލައްވަނީ --- ފޮޓޯ: ރައީސް އޮފީސް

މިމަހު 9 ގެ ނިޔަލަށް ނޭޝަނަލް އާޓް ގެލަރީގައި ކުރިޔަށްދާ މި މައުރަޒު ހުޅުވިފައި ހުންނާނީ ކޮންމެ ދުވަހެއްގެ ވެސް ހެނދުނު 9:00 އިން 12:00، މެންދުރުފަހު 2:00 އިން 6:00 އަށް އަދި ރޭގަނޑު 8:00 އިން 10:00 އަށެވެ.

ރައީސް އޮފީހުން ބުނީ މި މައުރަޒުގެ މައިގަނޑު ބޭނުމަކީ ނަސްރުގެ ދުވަހުގެ މައުލޫމާތު އަދުގެ ޖީލަށް ބުނެދިނުންކަމަށެވެ.

ނަސްރުގެ ދުވަހުގެ އިހުތިފާލުތައް ފެށުމުގެ ގޮތުން ފަތިހު އިސްލާމީ މަރުކަޒުގައި ޖަމާއަތުގައި ކުރި ފަތިސް ނަމާދުގައި ރައީސް މުއިއްޒު ވަނީ ބައިވެރިވެ ވަޑައިގެންފަ އެވެ. އެއަށްފަހު ރައީސުލްޖުމްހޫރިއްޔާގެ ދެކަނބަލުން ވަނީ 3 ނޮވެންބަރުގެ ހަނދާނީ ބިނާގައި ދިދަ ޖެހުމާއި ގާޑް މައުންޓް ކުރުމުގެ ރަސްމިއްޔާތު ޝަރަފުވެރިކޮށްދެއްވާފަ އެވެ.