ރާއްޖޭގައި މަތީ ފަންތީގެ ރިސޯޓެއް ކަމަށް މެންޑްރިން އޮރިއެންޓަލް ރިސޯޓު ހަދާ ދުބާއީގެ ދަމަކް ކުންފުނިން ޓޫރިސްޓުން އުފުލަން އެއާލައިނެއް ހަދަން ނިންމައިފި އެވެ.

ޔޫއޭއީގެ ދުބާއީގެ ދަމަކް ގުރޫޕަކީ ލަގްޒަރީ ރިއަލް އެސްޓޭޓް ޑިވެލޮޕަރުންގެ ތެރޭގައި މަޝްހޫރު ކުންފުންޏެކެވެ.

އެ ކުންފުނިން ކ. ބޮލިދުއްފަރުގައި މަތީ ފަންތީގެ ރިސޯޓެއް ހަދަނީ ރާއްޖޭގެ އައިމާ ކޮންސްޓްރަކްޝަނާ ހަވާލުކޮށްގެންނެވެ. މެންޑަރިން އޮރިއެންޓަލްގެ ނަމުގައި އެ ރިސޯޓު ހަދަނީ 34 ހެކްޓަރުގެ ބޮޑު ފަޅެއް ހިއްކައިގެންނެވެ.

ދަމަކް ގުރޫޕުން މިހާރު ވަނީ ކުރިއަށް އޮތް ހައެއްކަ ދުވަހުގެ ތެރޭގައި ކުންފުނީގެ އަމިއްލަ އެއާލައިނެއް ފެށުމަށް ނިންމާފައިވާ ކަމަށް އިއުލާންކޮށްފަ އެވެ.

މާލެ އަތޮޅު ބޮލިދުއްފަރުގައި ރިސޯޓެއް ހެދުމަށް ހިއްކުމުގެ މަސައްކަތް 2017 ވަނަ އަހަރު ކުރަނީ. އެތަނުގައި ހަދާ ރިސޯޓު ހިންގާނީ މެންޑަރިން އޮރިއެންޓަލްއިން.

މި އެއާލައިން ދަތުރުކުރުމަށް ހަމަޖެހިފައި ވަނީ ދަމަކް ގުރޫޕްގެ ޓޫރިޒަމް ވިޔަފާރި ހިންގަމުންދާ ގައުމުތަކަށެވެ. އެގޮތުން ރާއްޖެއާއި، އިންޑޮނޭޝިއާގެ ބާލީ އާއި، ފިޖީއާއި، ސީޝެލްސް އާއި ހަވާއީގެ އިތުރުން ބޯރާބޯރާ އަށެވެ.

އައިމާ ކުންފުންޏާ ހަވާލުކޮށްގެން ދަމަކް ކުންފުނިން ތަރައްގީކުރާ މެންޑަރިން އޮރިއެންޓަލްއަކީ 148 މިލިއަން ޑޮލަރު (2.2 ބިލިއަން ރުފިޔާ) ގެ އިންވެސްޓްމަންޓެކެވެ. މާލެ އަތޮޅުގެ ހުޅަނގު ދެކުނުގައި އޮންނަ 34 ހެކްޓަރުގެ ބޮޑު ރަށެކެވެ. މި ރިސޯޓުގައި ތިން ރަށް ހިމެނެ އެވެ. މި ތަނުގައި ޖުމްލަ 120 ކޮޓަރި ހުންނާނެ އެވެ. މި ރިސޯޓު އަންނަ އަހަރު ހުޅުވާނެ އެވެ. މި ރިސޯޓުގައި 56 އޯވާ ވޯޓާ ވިލާ އާއި 64 ބީޗް ފްރޮންޓް ވިލާ ހުންނާނެ އެވެ. މީގެ އިތުރުން މި ތަނުގައި މެޑަރިން އޮރިއެންޓަލްގެ އައިކޮނިކް 10 ރެސިޑެންސް ވެސް ހިމެނެ އެވެ.