އާބަން ސެންޓަރުގެ ގޮތުގައި ތަރައްގީކުރާ ރަށްތަކުން ލ.ގަން އުނިކޮށް ލިސްޓް އިއުލާންކޮށްފި

ސަރުކާރުން އާބަން ސެންޓަރުގެ ގޮތުގައި ތަރައްގީކުރާނެ ހަތް ރަށް އިއުލާން ކުރިއިރު، ލ.ގަން އުނިކޮށް ލިސްޓް އާއްމުކޮށްފި އެވެ.

އާބަން ސެންޓަރު ތަރައްގީކުރާނެ ރަށްތައް ކަނޑައެޅުމުގެ މަރުހަލާގައި ހައުސިން މިނިސްޓްރީން ވަނީ އާބަން ސެންޓަރު ތަރައްގީކުރުމަށް އެންމެ އެކަށޭނަ އަދި ފީސަބަލް ރަށްތަކުގެ ތެރޭގައި ލ.ގަން ހިމަނާފަ އެވެ.

ނަމަވެސް މިއަދު ހައުސިން މިނިސްޓްރީން އާއްމުކުރި ލިސްޓްގައި ލ.ގަމުގެ ބަދަލުގައި ހިމަނާފައިވަނީ ލ. ފޮނަދޫ އެވެ.

މިއަދު އެ މިނިސްޓްރީން ނެރެފައިވާ ނޫސްބަޔާނެއްގައި ބުނެފައިވަނީ ރައީސުލްޖުމްހޫރިއްޔާ މުހައްމަދު މުއިއްޒުގެ ވައުދުފުޅާއި އެއްގޮތުގެ މަތިން އާރބަން ސެންޓަރު ގާއިމްކުރާނެ 7 ރަށެއް ކަނޑައަޅުއްވާފައިވާކަމަށެވެ.

އެ ރަށްތަކަކީ

ރ. އުނގޫފާރު

ބ. އޭދަފުށި

ޅ. ނައިފަރު

އދ. މަހިބަދޫ

ފ. ނިލަންދޫ

ދ. ކުޑަހުވަދޫ

ލ. ފޮނަދޫ

ރާއްޖޭގެ އެންމެ ބިން ބޮޑު އެއް ރަށް ކަމަށްވާ ލ.ގަން މި ލިސްޓުން އުނިކުރުމާއި ގުޅިގެން އެ ރަށުގެ ބައެއް ރަށްޔިތުން ދަނީ ނުރުހުން ފާޅުކުރަމުންނެވެ.

ފާހަގަކޮށްލެވޭ ގޮތުގައި މި ބަދަލު ގެނެސްފައި މިވަނީ މަޖިލިސް ރައީސް އަދި ޕީއެންސީގެ ޗެއާޕާސަން އަބްދުއްރަހީމްގެ ދާއިރާ ކަމަށްވާ ފޮނަދޫއަށް ލ އަތޮޅުގެ ހުރިހާ ތަރައްގީގެ މަޝްރޫއެއް ގެންދިއުމުގެ ސިޔާސަތުގެ ތެރެއިންނެވެ. އަބްދުއްރަހީމްގެ ނުފޫޒުން ލ.ގަމަށް ލިބޭ ހުރިހާ ފުރުސަތުތަކެއް ހަނިކޮށް ފޮނަދޫއަށް ބަދަލުކުރަމުން ދިއުމަކީ ގަމު ދާއިރާގެ ރައްޔިތުން ވަރަށް ބޮޑަށް ދެކޮޅުހަދަމުން ދާކަމެކެވެ.