ބޭރު ފައިސާގެ މުއާމަލާތްތައް ކުރުމަށް ދާދިފަހުން މަރުކަޒީ ބޭންކް، އެމްއެމްއޭއިން އެކުލަވާލި އާ ގަވައިދާ އެއްގޮތަށް އަމަލު ނުކުރާނެކަން، ރާއްޖޭގައި ގިނަ ރިސޯޓުތަކެއް ހިންގާ ޔުނިވާސަލް ގްރޫޕުންވެސް އަންގައިފި އެވެ.

އެމްއެމްއޭގެ ގަވާއިދަށް އަމަލުނުކުރާނެކަން ހާމަކޮށް އެމްއެމްއޭގެ ގަވަރުނަރު އަހުމަދު މުނައްވަރު އަށް ޔުނިވާސަލް އެންޓަޕްރައިސަސްގެ ޗެއާމަން މުހައްމަދު އުމަރު މަނިކު (އެމްޔޫ މަނިކު) ވަނީ ސިޓީއެއް މިއަދު ފޮނުއްވާފަ އެވެ.

އެމްއެމްއޭއިން ގަވާއިދަށް ގެނައި ބަދަލަކީ ޓޫރިޒަމް އިންޑަސްޓްރީގެ ހަގީގަތްތަކާ ދުރު، މަޝްވަރާކުރުމެއް ނެތި ހަދާފައިވާ ގަވާއިދެއް ކަމަށް އެ ސިޓީގައި ޔުނިވާސަލްއިން ފާހަގަކޮށްފައިވެ އެވެ.

ޔުނިވާސަލްގެ ކޮންމެ ރިސޯޓެއްގެ އަހަރީ އާމްދަނީ 30 އިންސައްތަ އަށްވުރެ މަތީ އަދަދެއް ޓެކްސްގެ ގޮތުގައި ދައުލަތަށް ދައްކާކަން ފާހަގަކުރަމުން އެ ކުންފުނިން ބުނެފައިވަނީ ރިސޯޓުތަކުން ކުރާ ހަރަދުގެ 90 އިންސައްތަ ޑޮލަރުން ކުރާއިރު، އެމްއެމްއޭގެ ގަވާއިދުގައި އެކަމަށް ރިއާޔަތްކޮށްފައި ނުވާކަމަށެވެ.

އެގޮތުން ރިސޯޓުތަކުގެ ރޫމް ރޭޓަށް ބެލުމެއް ނެތި 500 ޑޮލަރު މާރުކުރަން ކަނޑައެޅުމަކީ ސަބަބުވެރި ނިންމުމެއް ނޫންކަމަށްވެސް ޔުނިވާސަލްއިން ވަނީ ބުނެފަ އެވެ.

ޔުނިވާސަލް އިން ރާއްޖޭގައި އަށް ރިސޯޓެއް ހިންގަ އެވެ.

އެމްއެމްއޭއިން އެކުލަވާލި އާ ގަވައިދާ އެއްގޮތަށް ޑޮލަރު މާރުކުރުމުން ރިސޯޓްތަކަށް ގެއްލުންވާ ކަމަށް ފާހަގަކޮށް އެ ގަވާއިދު އުވާލަން ރާއްޖޭގެ އެންމެ ބޮޑު އެއް ވިޔަފާރިވެރިޔާ ޗަމްޕާ މުހައްމަދު މޫސާ (އުއްޗު) ވެސް ވަނީ ސަރުކާރުގައި އެދިފަ އެވެ.

ކުރެއްދޫ ހޮލްޑިންގެ މެނޭޖިން ޑިރެކްޓަރުގެ ނަމުގައި އުއްޗު ސޮއިކުރައްވައި އެމްއެމްއޭގެ ގަވަރުނަރު އަހުމަދު މުނައްވަރަށް އިއްޔެ ފޮނުއްވި ސިޓީއެއްގައި ވަނީ އެ ގަވައިދުގައި ކަނޑައަޅާފައިވާ ގޮތަށް ކޮންމެ ރިސޯޓަކަށް އަންނަ ޓޫރިސްޓެއްގެ ބޮލަކަށް 500 ޑޮލަރު މާރުކުރުމަކީ ކުރެވޭނެ ކަމެއް ނޫން ކަމަށެވެ. އަދި އެފަދައިން އަމަލުކުރުމަކީ ޓޫރިޒަމް ދާއިރާގެ ވިޔަފާރިތަކަށް ވަރަށް ބޮޑު ގޮންޖެހުމެއް ކަމަށް ވެސް އެ ސިޓީގައިވެ އެވެ.