އިންޑިއާގެ މަޝްހޫރު ސުޕަހީރޯ ޓީވީ ސީރީޒްއެއް ކަމަށްވާ "ޝަކްތީމާން"ގެ ފިލްމުގެ ލީޑު ރޯލަށް ޓައިގާ ޝްރޮފް ވެސް ކަމުނުދާ ކަމަށް އެ ރޯލުން ފުރަތަމަ ފެނިގެންދިޔަ މުކޭޝް ހަންނާ ބުނެފި އެވެ.

އޭބީޕީ ލައިވްއަށް ދިން އިންޓަވިއުއެއްގައި މުކޭޝް ބުނެފައިވަނީ ޓައިގާއަކީ އަދިވެސް ކުޑަ ކުއްޖެއް ކަމަށާއި އެފަދަ ވަރުގަދަ ރޯލެއް އޭނާއަށް ނުކުޅެވޭނެ ކަމަށެވެ.

"ޝަކްތީމާންއަކީ ސިކުނޑި ނެތް ޅަ ކުއްޖެއް ނޫން. އެހެން ކަމުން އޭނާ (ޓައިގާ) އެ ރޯލު ކުޅެން އެކަށީގެންނެއް ނުވޭ" މުކޭޝް ބުނެފައިވެ އެވެ.

މުކޭޝް އިތުރަށް ބުނީ އެންމެ ފުރަތަމަ ޓީވީއިން ފެނުނު ޝަކްތީމާންއާއި ފިލްމުން ފެންނަ ޝަކްތީމާންގައި އެއްގޮތްކަން ހުންނަން ޖެހޭނެ ކަމަށާއި އެހެން ނޫން ނަމަ އެ ސީރީޒްއަށް އިންސާފު ނުކުރެވޭނެ ކަމަށެވެ.

ޓައިގާއާ ބެހޭ ގޮތުން މުކޭޝް މި ބީދައިން ވާހަކަ ދައްކާފައި މިވަނީ ޝަކްތީމާންގެ ރޯލަށް ރަންވީރު ސިންހް ވެސް އެކަށީގެންނުވާ ކަމަށް އެކިފަހަރު މަތިން ބުނުމަށްފަހު އެވެ.

ޝަކްތީމާންގެ ފިލްމުގެ މަސައްކަތްތައް މިސަބަބާހެދި ހުއްޓިފައިވާއިރު އެ ކެރެކްޓަރުގެ ގޮތުގައި އަނެއްކާވެސް މުކޭޝް ފެނުން އެކަށީގެންވާ ކަމަށް ހަބަރުތައް ބުނެ އެވެ.