އިންޑިއާގެ އުއްތަ ޕްރަދޭޝް ހޮސްޕިޓަލެއްގައި އަލިފާން ރޯވެ 10 ކުޑަކުދިން މަރުވެއްޖެ އެވެ.

އިންޑިއާގެ ނޫސްތަކުން ރިޕޯޓް ކޮށްފައިވާ ގޮތަގައި އަލިފާން ރޯވެފައިވަނީ ދުވަސް ނުފުރާ ވިހާ ކުދިން އަދި އިތުރު ފަރުވާ ބޭނުންވާ އަލަށް އުފަންވި ކުދިން އެޑްމިޓްކޮށްފައިވާ ނިއޯނޭޓަލް ކެއާ ޔުނިޓްގަ އެވެ.

މި ޔުނިޓްގައި އެ ވަގުތު 50 އަށް ވުރެ ގިނަ ތުއްތު ކުދިން ވަނީ އެޑްމިޓްކޮށްފަ އެވެ. އޭގެ ތެރެއިން ސަލާމަތް ކުރެވުނު 44 ކުދިންނެވެ. މަރުވި ކުދިންގެ ތެރެއިން 3 ކުދިންނަކީ ކޮން ކުއްޖެއްކަން އަދިވެސް ދެނެގަނެފައި ނުވާ ކަމަށް ހޮސްޕިޓަލުން ވަނީ ބުނެފައެވެ.

މި ހޮސްޕިޓަލުގެ މި ޔުނިޓުގައި އަލިފާން ރޯވި ސީދާ ސަބަބު ސާފެއް ނޫނެވެ. ބެލެވޭ ގޮތުގައި އަލިފާން ރޯވެފައި ވަނީ ކަރަންޓް ޝޯޓެއްގެ ސަބަބުންކަމަށް ފަޔާ ސޭފްޓީ އޮފިޝަލުން ވަނީ ބުނެފަ އެވެ.

މި ހިތާމަވެރި ހާދިސާއާ ގުޅިގެން އިންޑިޔާގެ ޕްރައިމް މިނިސްޓަރު ނަރެންދްރަ މޯޑީ ވަނީ އާއިލާތަކަށް ތައުޒިޔާ ވިދާޅުވެފަ އެވެ. އަދި މަރުވި ކޮންމެ ކުއްޖެއްގެ އާއިލާއަށް 5 ލައްކަ ރުޕީސް (5،900 ޑޮލަރު) ސަރުކާރުން ދޭން ވަނީ ނިންމާފަ އެވެ.