ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީއަށް އިސްލާހު ގެންނަނަމަ ރައްޔިތުންގެ ހިޔާލު ހުށަހެޅުމަށް އެކަށީގެންވާ ވަގުތު ދިނުމަށް ބާ ކައުންސިލުން ގޮވާލައިފި އެވެ.

ބާ ކައުންސިލުން މިއަދު ނޫސް ބަޔާނެއް ނެރެފައި މިވަނީ ސަރުކާރުން ރައްޔިތުންގެ މަޖިލީހަށް ގާނޫނުއަސާސީ އަށް ބަދަލުތަކެއް ގެނައުމަށް ހުށަހަޅައި މިއަދުން މިއަދަށް އެ ބަދަލު ގެނައުމަށް މަސައްކަތް ކުރަމުންދާ ވަގުތެއްގަ އެވެ.

ބާ ކައުންސިލުން ބުނީ ގާނޫނުއަސާސީއަށް ގެނެވޭ ބަދަލަކީ ރައްޔިތުންގެ ބައިވެރިވުމާއި، ހިޔާލު ހޯދުމާއެކު، ފުޅާދާއިރާއެއްގައި މަޝްވަރާކުރެވިގެން ގެނެވޭ އިސްލާހުތަކެއްކަމުގައި ވުމަކީ މުހިއްމު ކަމެއްކަމަށް ދެކޭކަމަށެވެ. އެހެންކަމުން ބިލާ ގުޅޭ ގޮތުން ރައްޔިތުން ހުށަހަޅަން ބޭނުންވާ ހިޔާލުތައް ހުށަހެޅުމަށް އެކަށީގެންވާ ފުރުސަތެއް ލިބޭގޮތަށް ބިލުގެ ކަންކަން އިންތިޒާމުކުރުމަށް ވަނީ ގޮވާލާފަ އެވެ.

މީގެ އިތުރުން އެ ކައުންސިލުން ވަނީ ސަރުކާރުން ހުށަހަޅާފައިވާ ބިލާއި ގުޅިގެން ބާ ކައުންސިލުގެ މެންބަރުންނާއި ގާނޫނީ ދާއިރާގެ އެކި ފަރާތްތަކުގެ ކަންބޮޑުވުންތައް ހުރުމުން އެ ބިލާ ގުޅިގެން ބާ ކައުންސުލުގެ އާންމު މެންބަރުންގެ ހިޔާލާއި މަޝްވަރާ ރައްޔިތުންގެ މަޖިލީހަށް ހުށަހެޅުމުގެ ފުރުސަތު ދިނުމަށް އެދި މިއަދު މަޖިލީހަށް ހުށަހަޅާފަ އެވެ.

ސަރުކާރުން ގާނޫނުއަސާސީއަށް ގެންނަ ބަދަލުތަކަކީ މެންބަރުން ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން ނުވަތަ އެހެން ޕާޓީއަކަށް ގުޅުމުން ވަގުތުން ގޮނޑި ގެއްލޭ ގޮތް ހެދުމަށާއި ރާއްޖޭގެ ސަރަހައްދުން ބައެއް ދޫކޮށްލެވޭނީ ރައްޔިތުންގެ މަޖިލީހުން ފާސްކޮށްގެން ކަމަށް ހެދުމުގެ އިތުރުން ރާއްޖޭގައި ބޭރު ގައުމެއްގެ އެއްވެސް އަސްކަރީ ބަޔަކަށް ތިބެވޭނީ މަޖިލީހުން ފާސްކޮށްގެން ކަމަށް ބަދަލުކުރުމަށެވެ.

ސަރުކާރުގެ ފަރާތުން މި އިސްލާހުތައް ހުށަހެޅުއްވީ ހުޅުދޫ ދާއިރާގެ މެންބަރު މުހައްމަދު ޝާހިދެވެ.

ސަރުކާރުން ގާނޫނުއަސާސީ އިސްލާހުކުރަން ހުށަހަޅާފައިވާ ބިލުގެ މަސައްކަތް ވީހާ ވެސް އަވަހަށް ނިންމަން ރައްޔިތުންގެ މަޖިލީހުގެ، މުޅި މަޖިލީހުގެ ކޮމިޓީން ފާސްކުރުމަށްފަހު އެ އިސްލާހު މިއަދުން މިއަދަށް ފާސްކުރުމަށް މިއަދު ހަވީރަށް ވަނީ މަޖިލިސް ޖަލްސާއެއް އެޖެންޑާކޮށްފަ އެވެ.