އިޒްރޭލާއި ފަލަސްތީނާއި ދެމެދު ކުރަމުންދާ ހަނގުރާމަ ޝަރުތެއް ނެތި ދާއިމަށް ހުއްޓާލުމަށް އަންގައި އދ.ގެ ސަލާމަތީ މަޖިލީހުން ފާސްކުރަން މަސައްކަތްކުރި ގަރާރު އެމެރިކާއިން ވީޓޯކޮށް ބޭރުކޮށްލައިފި އެވެ.

މި ގަރާރުގައި ހަމާސްއިން ރަހީނުކޮށްފައިވާ މީހުން އެއްވެސް ޝަރުތަކާ ނުލައި ދޫކޮށްލުމަށާއި ދެ ފަރާތުން ވެސް ހަނގުރާމަ ހުއްޓާލުމަށް އެންގުމަށާއި މި ގާރަރު ތަންފީޒު ކުރުމަށް އދ. އިން ކުރަން ޖެހޭ މަސައްކަތް ކުރުމަށް ހިމަނާފައިވެ އެވެ.

މީގެ އިތުރުން ޣައްޒާގައި ބަނޑުހައި ހޫނުކަމުގެ ހާލަތުގައި ތިބި ހާލުގައި ޖެހިފައިވާ މީހުންނަށް ކާނާ ފޯރުކޮށް ދިނުމުގެ ފުރުސަތު ވަގުތުން ފަހިކޮށް ދިނުމަށް ވެސް ގަރާރުގައިވެ އެވެ.

މި ގަރާރު ހުށަހަޅާފައިވަނީ ސަލާމަތީ މަޖިލީހުގެ އިންތިހާބީ މެންބަރުންގެ ގޮތުގައި ހިމެނޭ އަލްޖީރިއާ، އެކުއަޑޯ، ގަޔާނާ، މާލްޓާ، މޮޒަމްބީކް، ދެކުނު ކޮރެއާ، ސިއެރަ-ލިއޯން، ސްލޮވީނިއާ އަދި ސްވިޒަލޭންޑުންނެވެ.

ގަރާރު ފާސް ކުރުމަށް 14 ވޯޓް ލިބުނުނަމަވެސް އެ މަޖިލީހުގެ ދާއިމީ މެންބަރު އެމެރިކާއިން އެ ގާރާރު ވީޓޯކޮށް ވަނީ ބޭރުކޮށްލާފަ އެވެ.

މިއާއެކު ޣައްޒާ އަށް ކާނާ އާއި އިންސާނީ އެހީތެރިކަން ފޯރުކޮށް ދިނުމަށް ވަނީ ހުރަސްއެޅިފަ އެވެ. މިހާރުވެސް ޣައްޒާއަށް ފޮނުވާ އެހީތަކަށް އިޒްރޭލުން ހުރަސްއަޅަމުން ދިއުމުގެ ސަބަބުން ހާލުގައި ޖެހިފައިވާ މީހުނާއި ހަމައަށް އެހީ ފޯރުކޮށްދިނުމުގައި ބޮޑެތި ގޮންޖެހުންތަކާއި ވަނީ ކުރިމަތިލާން ޖެހިފަ އެވެ.