ދަތުރުފަތުރަށް މި އަހަރުގެ ބަޖެޓުގައި ކަނޑައެޅި އަދަދަށް ވުރެ އިތުރަށް ތިން މިލިއަން މިއަހަރު މިހާތަނަށް ހަރަދުކޮށް، ދަތުރުފަތުރުގެ ޖުމްލަ ހަރަދު 231 މިލިއަން ރުފިޔާއަށް އަރާފައިވާ ކަމަށް ފިނޭންސް މިނިސްޓްރީގެ ތަފާސް ހިސާބުތަކުން ދައްކައިފި އެވެ.

ފިނޭންސް މިނިސްޓްރީން މި އަހަރުގެ ދަތުރުފަތުރަށް ކަނޑައަޅާފައިވާ އަދަދަކީ 228 މިލިއަން ރުފިޔާ އެވެ. ބަޖެޓުގައިވާ ގޮތުން ބޭރު ދަތުރުތަކަށް ކަނޑައަޅާފައިވަނީ 69 މިލިއަން ރުފިޔާ އެވެ. އަދި އެތެރޭގެ ވައިގެ ދަތުރުތަކަށް ކަނޑައަޅާފައިވަނީ 54 މިލިއަނެވެ. ކަނޑު ދަތުރުތަކަށް އޮތީ 45 މިލިއަން ރުފިޔާ އެވެ.

ފިނޭންސް މިނިސްޓްރީން ހަފުތާއަކު އެއްފަހަރު އާންމުކުރާ މާލީ ހިސާބުތަކަށް ބަލާއިރު ނިމުނު އަހަރާ އަޅާބަލާއިރު މި އަހަރު ދައުލަތުގެ ހަރަދުތައްވެސްވަނީ އިތުރުވެފަ އެވެ. ހަރަދުތަކުގެ ތެރެއިން އެންމެ ބޮޑަށް އިތުރުވީ ރިކަރަންޓު ހަރަދެވެ. އެހެން އަހަރުތަކެކޭ އެއްގޮތަށް އެންމެ ބޮޑު ހޭދައެއް މިއަހަރުވެސް ކުރީ ސަރުކާރުގެ މުވައްޒަފުންނަށް މުސާރަ ދިނުމާއި ހިންގުމުގެ ހަރަދަށެވެ. މިކަމަށް ޖުމްލަ ހަރަދުގެ 70 އިންސައްތަ ހަރަދުވެފައިވާކަމަށް ތަފާސްހިސާބުތަކުން ދައްކަ އެވެ.

މި އަހަރުގެ މިހާތަނަށް ދައުލަތުގެ ބަޖެޓުން 40.3 ބިލިއަން ރުފިޔާ ވަނީ ހަރަދުކޮށްފަ އެވެ.