މަޝްހޫރު ކާޑޭޝަން އާއިލާގެ ހަބަރުތަކަށް ބަލާއިރު އެންމެ ފަހުން އިންޓަނެޓުގެ ސަމާލުކަމަށް އައީ ޓެކްނޮލޮޖީ ކުންފުނި ޓެސްލާއިން އުފައްދާފައިވާ 30،000 ޑޮލަރުގެ އަގުބޮޑު ރޮބޮޓަކާއެކު ކިމް ކާޑޭޝަން ނަގާފައިވާ ފޮޓޯތަކެކެވެ.

ބެލެންސިއާގާއާއެކު ވެފައިވާ ކޮލެބޮރޭޝަންއަކަށް ކުރިއަށް ގެންދިޔަ ކިމްގެ އެ ފޮޓޯ ޝޫޓުގައި އޭނާ ވަނީ އޮޕްޓިމަސް ނަމަކަށް ކިޔާ ހިއުމަނޮއިޑް ރޮބޮޓްއަކާއެކު ފޮޓޯތަކެއް ނަގާފަ އެވެ.

އެ ފޮޓޯތައް އިންޓަނެޓުގައި ދައުރުވާން ފެށުމާއެކު ގިނަ ބަޔަކު ވަނީ ކިމް އެގޮތަށް އެ ރޮބޮޓާއެކު ފޮޓޯ ނަގާފައިވަނީ ޓެސްލާއިން އެކަމަށް ފައިސާ ދީގެން ކަމަށް ބުނެފަ އެވެ. އެގޮތުން އެއީ އެ ކުންފުނިން "އޮޕްޓިމަސް" ރޮބޮޓް ޕްރޮމޯޯޓް ކުރަން ގެންގުޅުނު އުކުޅެއް ކަމަށް މީޑިއާތަކުގައި ވެސް ރިޕޯޓު ކުރެވުނެވެ.

މި އަޑުތައް ގަދަވެ އެންމެ ފަހުން ކިމް މިވަނީ އެ އަޑުތަކަށް ރައްދު ދީފަ އެވެ. ކިމްގެ ފަރާތުން މީޑިއާއަށް މައުލޫމާތު ދިން ފަރާތަކުން ވަނީ އެ ތުހުމަތުތަކަށް ދެކޮޅު ހަދާފަ އެވެ.

އެ ފަރާތުން ބުނީ އެ ފޮޓޯތައް އެގޮތަށް ނަގަން ޓެސްލާއިން އެއްވެސް ފައިސާއެއް ހުށައަޅާފައި ނުވާ ކަމަށާއި ކިމް އެފަދަ ހުށައެޅުމެއް ގަބޫލު ވެސް ކޮށްފައިނުވާ ކަމަށް ވެސް ބުނެފައިވެ އެވެ.

އެ އަޑުތަކަށް ކިމްގެ ޓީމުން ދެކޮޅު ހެދި ނަމަވެސް އޭނާގެ އެ ފޮޓޯތަކާއެކު ޓެސްލާގެ "އޮޕްޓިމަސް" ރޮބޮޓަށް ލިބޭ ސަމާލުކަން ވަނީ ބޮޑުތަނުން އިތުރުވެފަ އެވެ.