ގދ. ތިނަދޫ ސިޓީއަކަށް ބަދަލުކުރީ އޮޅުވާލައިގެން ގާނޫނާ ހިލާފަށް ކަމަށް ތުހުމަތުކޮށް އެ މައްސަލަ އެންޓި ކޮރަޕްޝަން ކޮމިޝަން (އޭސީސީ)އަށް ހުށަހަޅައިފި އެވެ.

"ހުރިހާ"އަށް އެނގިފައިވާގޮތުގައި މިދިޔަ އަންގާރަ ދުވަހު އެ މައްސަލަ އޭސީސީއަށް ހުށަހެޅީ ގާނޫނީ ވަކީލު މުހައްމަދު ރާގިބު އަހްމަދެވެ. އެ މައްސަލަ ތަހުގީގު ކުރަން ކޮމިޝަނުން ނިންމި ކަމެއް މިހާތަނަށް ހާމަކޮށްފައެއްނުވެ އެވެ.

ތިނަދުއަށް ސިޓީއެއްގެ ދަރަޖަ ދެއްވާފައި ވަނީ މިދިޔަ އޮކްޓޫބަރު މަހުގެ 30 ވަނަ ދުވަހު އޭރުގެ ރައީސް އިބްރާހީމް މުހައްމަދު ސޯލިހެވެ. އެއަށްފަހު ގާނޫނަށް ގެނައި އިސްލާހަކާއެކު ތިނަދޫ ކައުންސިލަކީ ސިޓީ ކައުންސިލަކަށް ވަނީ ބަދަލުވެފަ އެވެ. އަދި އެ ކައުންސިލްގެ ރައީސާއި ނައިބު ރައީސްގެ މަގާމު މޭޔަރާއި ޑެޕިއުޓީ މޭޔަރަށް ވަނީ ބަދަލުވެފަ އެވެ. އަދި ކައުންސިލް މެމްބަރުންނަކީ ސިޓީ ކައުންސިލްގެ މެމްބަރުން ކަމުގައި ވަނީ ބަދަލުވެފަ އެވެ.

ގާނޫނު ބުނާގޮތުން ސިޓީއެއްގެ ދަރަޖަ ދެވޭނީ އާބާދީގައި 10،000 މީހުން ހަމަވާ ރަށްތަކަށެވެ.

ރާގިބު ވިދާޅުވީ ތިނަދުއަށް ސިޓީއެއްގެ ދަރަޖަ ދީފައި ވަނީ ތިނަދޫ ކައުންސިލުން ހިއްސާކުރި ލިޔުމަކަށް ބަލައިގެން ކަމަށެވެ. އެ ލިޔުމުގައި އެރަށުގެ އާބާދީ އަކީ 10،150 މީހުން ކަމަށް ބަޔާންކޮށްފައި ވިޔަސް އެއީ ސައްހަ އަދަދެއް ނޫން ކަމަށެވެ. އޭނާ އެ މައްސަލަ ހުށަހެޅުއްވީ އެކަމާ ގުޅޭ ލިޔުންތަކާއެކު އެވެ.

ތިނަދުއަށް ދީފައިވާ ސިޓީގެ ދަރަޖަ ބާތިލްކުރަން ރާގިބު ވަނީ ހައިކޯޓަށް ވެސް މައްސަލައެއް ހުށަހަޅުއްވާފަ އެވެ.

ކޯޓަށް ހުށަހެޅުނު މައްސަލައިގައި ފާހަގަކޮށްފައިވާ ގޮތުން، 10،000 މީހުން ހަމަކުރުމަށް ތަކުރާރުކޮށް އައިޑީކާޑު ބޭނުންކޮށްފައިވާ ކަމަށާއި، އެވަގުތު މަރުވެފައިވާ 115 މީހުން އާބާދީގައި ހިމަނާފައިވާކަން ފާހަގަކޮށްފައިވެ އެވެ. އަދި ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރު) ގެ ރެޖިސްޓްރީ ލިސްޓަށް ބެލުމުން އެ އަދަދު 196 އަށް އަރާ ކަމަށް ވެސް ބުނެފައިވެ އެވެ.

ހައިކޯޓަށް ހުށަހެޅި މައްސަލާގައި ވަނީ ތިނަދޫ ކައުންސިލުން ތައްޔާރުކޮށްފައިވާ އެރަށުގެ ޖުމްލަ އާބާދީގެ ލިސްޓާއި ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން (ޑީއެންއާރް)ގައި ވާ ތިނަދޫގެ އާބާދީގެ ޖުމްލަ ލިސްޓާ ދިމާނުވާ ކަމަށެވެ.

މި މަހުގެ 17 ވަނަ ދުވަހާ ހަމައަށް ޑީއެންއާރުގެ ރެޖިސްޓްރީން ދައްކާ ގޮތުން ތިނަދޫގެ އާބާދީއަކީ 7،924 ކަމަށް ވެސް ހައިކޯޓަށް ހުށަހެޅި މައްސަލާގައިވެ އެވެ.