ދަރިމައިވުމުގެ ސިއްހަތަށް ބަލާއިރު، އަޅުގަނޑުމެންގެ ދިރިއުޅުމުގެ އާދަކާދައާއި ސިއްހަތަކީ ވަރަށް ބޮޑު ދައުރެއް އަދާކުރާ ކަންކަމެވެ. މީގެ ތެރެއިން ވެސް އެންމެ އާންމުކޮށް އާދައިގެ ކަމެއްގެ ގޮތުގައި ދޫކޮށްލެވޭ އެއް ކަމަކީ ނިދުމުގެ އާދަ ތަކެވެ.

ސިއްހީ މާހިރުންނާއި ދަރިމައިވުމާ ބެހޭ ހާއްސަ ޑޮކްޓަރުން ބުނާ ގޮތުގައި، ރޭގަނޑު ހަ ގަޑިއިރަށްވުރެ މަދުން ނިދުމަކީ އަންހެނުންނާއި ފިރިހެނުންގެވެސް ދަރިމައިވުމުގެ ސިއްހަތަށް ނޭދެވޭ އަސަރުތަކެއް ކުރާ ކަމެކެވެ. ނަމަވެސް، މީގެ އަނެއްކޮޅަށް ބަލާއިރު، މާ ގިނައިން ނިދުމަކީވެސް މައްސަލަ އެކެވެ.

6 ގަޑިއިރަށްވުރެ މަދުން ނިދުމުން ދިމާވާ މައްސަލަތައް

އިންސާނާގެ ހަށިގަނޑުގެ ހޯމޯންތައް ބެލެންސްކޮށް ބެހެއްޓުމުގައި ނިދުމަކީ އެންމެ މުހިންމު ވަސީލަތެވެ. އެކަށީގެންވާ ވަރަށް ނިދި ނުލިބޭނަމަ، ހަށިގަނޑުގެ ގުދުރަތީ ހޯމޯން ސައިކަލަށް ބުރޫއަރަ އެވެ.

އަންހެނުންނަށް ކުރާ އަސަރު: މަދުން ނިދުމުގެ ސަބަބުން، ބިސް އުފެއްދުމަށާއި މައްސަރު ކަންތައް ގަވާއިދުން ހިނގުމަށް އެހީތެރިވެދޭ ހޯމޯންތައް އުފައްދާ މިންވަރު މަދުވެ އެވެ. މީގެ އިތުރުން، ނިދި މަދުވުމުން ހަށިގަނޑުގައި ސްޓްރެސް ހޯމޯން އިތުރުވެ، މައްސަރު ކަންތައް ނުގަވާއިދުވުމަށް މަގުފަހިވެ އެވެ.

ފިރިހެނުންނަށް ކުރާ އަސަރު: ފިރިހެނުންގެ ދަރިމައިވުމުގެ މައިގަނޑު ހޯމޯން ކަމަށްވާ 'ޓެސްޓޮސްޓެރޯން' އެންމެ ގިނައިން އުފައްދަނީ ރޭގަނޑު ފުން ނިދީގަ އެވެ. މަދުން ނިދާ ފިރިހެނުންގެ ޓެސްޓޮސްޓެރޯން ލެވެލް ދަށްވެ، ދަރިމައިވުމަށް ބޭނުންވާ ދަރިފަނީގެ މިންވަރާއި އޭގެ ފެންވަރު ދަށްވެގެންދެ އެވެ.

މާ ގިނައިން ނިދުމަކީވެސް ހައްލެއް ނޫން!

ބައެއް މީހުންނަށް ހީވެފައި އޮންނަނީ މަދުން ނިދުމުން ލިބޭ ގެއްލުން، މާ ގިނައިން (ނުވަ ގަޑިއިރަށްވުރެ ގިނައިން) ނިދައިގެން ރަނގަޅު ކުރެވިދާނެ ކަމަށެވެ. ނަމަވެސް، ދިރާސާތަކުން ދައްކާ ގޮތުގައި މާ ގިނައިން ނިދުމަކީވެސް ހަށިގަނޑުގެ އެތެރޭގެ ގަޑި (ސާކޭޑިއަން ރިދަމް) ހަލާކުކޮށް، ހޯމޯންތަކުގެ ބެލެންސް ގެއްލުވައިދޭ ކަމެކެވެ. މީގެ ސަބަބުންވެސް ދަރިމައިވުމުގެ ގާބިލުކަމަށް ނޭދެވޭ އަސަރުކުރެ އެވެ.

އެންމެ އެކަށީގެންވާ މިންވަރަކީ ކޮބާ؟

ދަރިމައިވުމުގެ ސިއްހަތު ރަނގަޅުކުރުމަށްޓަކައި މާހިރުން އިރުޝާދު ދެއްވަނީ ކޮންމެ ރެއަކުވެސް 7 ގަޑިއިރާއި 8 ގަޑިއިރާ ދެމެދުގެ އަރާމު ނިދިއެއް ހޯދުމަށެވެ. އަދި ހަމައެކަނި ނިދާ ވަގުތުގެ އިތުރުން، ނިދީގެ ފެންވަރު ރަނގަޅު ކުރުމަކީ ވެސް މުހިންމު ކަމެކެވެ.

ނިދުމުގެ އާދަތައް ރަނގަޅު ކުރުމަށްޓަކައި ކޮންމެ ރެއަކުވެސް އެއް ގަޑިއަކަށް ނިދަން އާދަ ކުރުމާއި، ނިދުމުގެ ކުރިން ސްމާޓް ފޯނާއި ޓީވީ ފަދަ އެއްޗެހީގެ ސްކްރީންތަކާ ދުރުވުމާއި، ކެފެއިން ބޭނުންކުރާ މިންވަރު މަދު ކުރުން ހިމެނެ އެވެ.

ދަރިއަކު ހޯދުމަށް މަސައްކަތްކުރާ ނަމަ، ކެއިންބުއިމާއި ކަސްރަތަށް ސަމާލުކަންދޭ ފަދައިން، ރޭގަނޑު ހަމަނިދި ހޯދުމަކީވެސް ކޮންމެހެން ކުރަންޖެހޭ މުހިންމު ކަމެކެވެ.