އާޓިފިޝަލް ބީޗްގައި ބިދޭސީންތަކެއް ހަމަނުޖެހުން ހިންގި މައްސަލައިގައި ފިޔަވަޅު އެޅުމުގެ މަސައްކަތް ކުރަމުން ދާކަމަށް އިމިގްރޭޝަންގެ ކޮންޓްރޯލާ މުހައްމަދު ޝައްމާނު ވިދާޅުވެއްޖެ އެވެ.

ސޯޝަލް މީޑިއާގައި ދައުރުވަމުންދާ ވީޑިއޯއަކުން ފެންނަ ގޮތުގައި މިއަދު އިރުއޮއްސުނު ގަޑީގައި އާޓިފިޝަލް ބީޗްގައި ގިނަ އަދަދެއްގެ މީހުން ޖަމާވެފައިވަނިކޮށް، ބަޔަކު ވަނީ އެކަކު އަނެއްކަކަށް ހަމަލާދީ، ޒުވާބުކޮށް ހަދާފަ އެވެ.

މައްސަލަ ގޯސްވެފައި ވަނީ އެތަނަށް ދިޔަ އިންޑިއާ ބަޔަކު ޒުވާބުކޮށް ހަމަނުޖެހުން ހިންގި ވަގުތު އޭގެތެރެއިން އެކަކު އެ ވަގުތު އެ ސަރަހައްދުގައި ހުރި ކުޑަ ކުއްޖެއްގެ ގައިގާ ޖެހިގަތުމުންނެވެ. އެކަމާއި ހިތްހަމަނުޖެހިގެން އެ ކުއްޖާގެ ބެލެނިވެރިޔާ ވަނީ ފުލުހަށް ރިޕޯޓް ވެސް ކޮށްފަ އެވެ. ނަމަވެސް ފުލުހުން އެ ތަނަށް ދިޔައިރު ހަމަނުޖެހުން ހިންގި މީހުން ވަނީ ގޮސްފަ އެވެ.

މިކަމާއި ގުޅިގެން ޝައްމާނު ވިދާޅުވީ އާޓިފިޝަލް ބީޗު ސަރަހައްދުގައި މާރާމާރީ ހިންގައި، އާއްމު މަސްލަހަތު ނަގާލުމުގައި ބައިވެރިވެފައިވާ ބިދޭސީންގެ މައްސަލަ ޓާސްކް ފޯހުން މިހާރު ބަލަމުންދާ ކަމަށެވެ. އަދި މިކަމުގަ ޝާމިލުވެފައިވާ ބިދޭސީންނަށް ފިޔަވަޅު އަޅާނެ ކަމުގެ ޔަޤީންކަން އަރުވާކަމަށް އޭނާ ވިދާޅުވި އެވެ.

ހާއްސަކޮށް ހުކުރު ދުވަހު ގިނަ އަދަދެއްގެ ބިދޭސީން ގޮސްއުޅޭ އާޓިފިޝަލް ބީޗަކީ ގިނަ ކުޑަކުދިން ގޮވައިގެން މީހުން ގޮސް އުޅޭ ސަރަހައްދެކެވެ. ފަހަކަށް އައިސް ބިދޭސީން އެ ސަރަހައްދުގައި މަސްތުވާތަކެތި ބޭނުންކުރާކަމުގެ ޝަކުވާވެސް ބައެއް ފަރާތްތަކުން ކޮށްފައިވެ އެވެ.