ކައްޒާބު ކިޔައިގެން މައްސަލަތަކެއް ޖެހިއްޖެ އެވެ. ސޯޝަލް މީޑިއާގައި ދައުރުވާ ޚަބަރުތަކުން އެނގޭގޮތުގައި ކައްޒާބު ކިޔައިގެން ޖެހުނު މައްސަލަތަކެއްގައި ބަޔަކާ ސުވާލު ކުރެވި ތަހުގީގުތަކެއް ހިނގައިފި އެވެ. ސުވާލަކީ މީހަކާ ދިމާޔަށް ކައްޒާބު ކިޔަން ވެދާނެ ހެއްޔެވެ؟

ކައްޒާބުގެ މައްސަލަ ފެންމަތިވުމާއެކު ސޯޝަލް މީޑިއާގައި އެބަސް ބޭނުންކުރާ މީހުނަށް ހަރުކަށި އަދަބު ދޭން އެއްބަޔަކު ގޮވާލި އެވެ. އެމީހުންނަށް ޖަދަލު ކުރި މީހުންގެ ސުވާލަކަށްވީ ކައްޒާބު ކިއުން މަނާވަނީ ކޮން ގާނޫނަކުން ހެއްޔެވެ. އެ ހިސާބުން އޭގެ ޖަވާބު އެހެން ގްރޫޕަކުން ވަރަށް ފުރިހަމަޔަށް ދިނެވެ. ޣީބަ ބުނުމާ ދެބަ އޮޑުވުމަކީ އިސްލާމް ދީނުގައި މާތްﷲ ހަރާމް ކުރައްވާފައިވާ ކަންތަކެވެ. އެފަދަ ކަންތައް ކުރާ މީހުނަށް ހަރުކަށި އަދަބު ލިބެން ވާނެ އެވެ. މި ހިސާބަށް ދިއުމުން ބަލާލަން ޖެހުނީ ކައްޒާބަކީ ކޮން އެއްޗެއްތޯ އެވެ.

ކައްޒާބު މިބަސް އިންޓަނެޓްގައި ސާޗްކޮށްލުމުން އެއީ އަރަބި ބަހެއްކަން އެނގުނެވެ. ދިވެހި ބަހުގެ ތެރެއަށް ވަރަށް ގިނައިން އަރަބި ބަސްތައް ވަދެ މަސްހުނިވެފައި ހުންނާތީ މިވެސް އެހެން ވެފައި އޮތް ބަހެއް ކަމަށް ވެދާނެކަމަށް ބެލީމެވެ. އެހެން ނަމަވެސް އާންމުކޮށް ބޭނުންކުރާ އެފަދަ ބަސްބަހާ ޚިލާފަށް މިބަހުގެ މާނަ ގިނަ ބަޔަކަށް ދޭހަވާ ކަމަކަށް ނުވި އެވެ. އެހެންކަމުން އިރާދަ ކުރެއްވުން ކިއުމުގެ ބަދަލުގައި އިންޝާﷲ ކިއުން ފަދަ، ރޯދަ ވީއްލުމުގެ ބަދަލުގައި އިފްތާރު ކިއުންފަދަ ޒަމާނީ އަރަބި އިސްލާމީ ބަދަލުގެ ޓްރެންޑެއްގެ ތެރެއިން އައިސްގެން އުޅޭ ބަހެއްކަމުގައި ވާނެ ކަމަށް ބެލީމެވެ. ބަހުގެ މާނައެއްކަމުގައި އޮތީ ދޮގު ހަދާމީހާ އެވެ. ދިވެހި ބަހުން ކިޔާ އުޅެނީ ދޮގުވެރިޔާ އެވެ. އެހެންކަމުން އެފަދަ ބަހެއް މީހަކާ ދިމާޔަށް ބުނަން ވެދާނެބާއޭ ހިތަށް އަރަ އެވެ. ޚާއްސަކޮށް ދިވެހިރާއްޖެ ގައުމިއްޔަތު ދިރުވުމުގެ އާ ޒަމާނަކާ ކުރިމަތިލާފައި ވާއިރު، މިފަދަ އިބާރަތަކުން މީހުނާ ދިމާލަށް މުޚާތަބުކުރުމަކީ ރަނގަޅު ކަމަކަށް ނުވެދާނެ އެވެ.

ޑރ. މުހައްމަދު މުއިއްޒު ރާއްޖޭގެ ރައީސް ރައީސް ކަމުގެ ހުވާ ކުރެއްވުމަށްފަހު، އެ ރަސްމިއްޔާތަށް ވަޑައިގެންތިއްބެވި އިއްޒަތްތެރި ބޭބޭފުޅުންނަށް ފުރަގަސް ދެއްވައި ހުންނަވައި ވަނީ ގައުމިއްޔަތުގެ އާ ސަފުހާއެއް ނިއުޅުއްވާނެ ކަމަށް ވިދާޅުވެފަ އެވެ. އެމަނިކުފާނު ވިދާޅުވެފައިވާ ގޮތުގައި ރާއްޖޭގެ އިޖުތިމާއީ އަޚުލާގުގެ ފޭރާން އާކޮށް އަޚުލާގީގޮތުން ރަނގަޅު މުޖުތަމައެއް އެމަނިކުފާނު ބިނާ ކުރައްވާނެ އެވެ. ގައުމު ދެކެ ލޯބިވާ އެކަކު އަނެކަކަށް އިހުތިރާމް ކުރާ މުޖުތަމައެއް އެމަނިކުފާނު ގާއިމުކޮށް ދެއްވާނެ އެވެ. އުފާވެރި ވާހަކަތަކެކެވެ. ރައްޔިތުން ތިބީ ފޮނި އުންމީދެއްގަ އެވެ.

ރައީސްގެ އުންމީދީ ވާހަކަފުޅާ ގުޅިގެން ހަނދާނަށް އައީ އެމަނިކުފާނުގެ ރިޔާސީ ކެމްޕޭނުގައި ކުޅުދުއްފުށީގައި އޮތް ޖަލްސާއެއްގައި ވާހަކަދެއްކި އަންހެނެއްގެ ވާހަކަ އެވެ. ކެމްޕޭން ޕޯޑިއަމްގައި ހުރެ ޖޯޝާއި ފޯރީގައި ދައްކަމުން ދިޔަ ވާހަކަ އެއްވެސް ކުރަކި ކަމެއް ނެތި އޮހެމުން ދިޔައިރު އެއީ މީގެ ވިއްސަކަށް އަހަރު ކުރި ނަމަ އާއިލާގެ ކުޑަކުދިންނާއެކު އަހާލަން ކެރޭނެ ފަދަ ވާހަކަތަކެއް ނޫނޭ ހިތަށް އެރި އެވެ. ބާޒާރު މަތީ ބަހުރުވައިން އެންމެ ހަޑިހުތުރުކޮށް ބަވާލީ އޭރުގެ ރައީސަށެވެ. ގޮވީ ވަގަށެވެ. އަތްޖަހަން ތިބީ މިހާރުގެ ރައީސާއި ސަރުކާރުގެ އިސް ވެރިން ހިމެނޭހެން ޕާޓީގެ ސަޕޯޓަރުންނެވެ.

ރައީސް މުއިއްޒު ހުވައި ކުރެއްވުމަށްފަހު ދެއްކެވި ވާހަކަފުޅުގައި ގައުމިއްޔަތު ދިރުވައި އަޚުލާގު ރަނަގަޅު މުޖުތަމައެއް ބިނާކުރައްވާނެ ކަމަށް ވިދާޅުވުމުން އެމަނިކުފާނުގެ ސިޔާސީވެރިންގެ ޓީމުން އެކަމުގެ ހެކި ފެންނާނެ ކަމަށް ހީވި އެވެ. ނަމަވެސް ޕޯޑިއަމުގައި ހަޑިހުތުރު ބަހުން މުޚާތަބުކުރި އަންހެން މީހާ ވެސް ރައީސްގެ ސިޔާސީ އިސް ލީޑަރުންގެ ޓީމުން ޖާގަލިބުމުން ދެއްކެވި ވާހަކަފުޅާ އަމަލާ ދިމާ ނުވާކަމަށް ބަލަން ޖެހުނެވެ.

ރައީސް މުއިއްޒު ވެރިކަމަށް ވެރިކަމަށް ވަޑައިގެންނެވީ ވަރަށް ގިނަ ވައުދުތަކެއް ރައްޔިތުންނަށް ވެވަޑައިގެންފަ އެވެ. އޭގެ ލިސްޓު ވަރަށް ދިގެވެ. މިތާގައި ފާހަގަކޮށްލާނީ އޭގެ ތެރެއިން އެންމެ ދެކަމެކެވެ. ފުރަތަމަ ކަމަކީ ރައީސް އަބްދުﷲ ޔާމީނަށް ސިޔާސީ ދައުވާއެއް ކޮށް ލިބެމުންދާ "އަނިޔާ" ނިމުމަކަށް ގެންނަވައި އެމަނިކުފާނު މިނިވަން ކުރެއްވުމެވެ. އެހެން ނަމަވެސް ވެރިކަމަށް އަހަރު ވީއިރުވެސް ރައީސް ޔާމީން ހުންނެވީ އެމަނިކުފާނު އެ ވިދާޅުވި ސިޔާސީ ދައުވާގަ އެވެ. އެކަމަކަށް ނިމުމެއް ނެތެވެ.

ދެވަނަ ކަމަކީ ރައްޔިތުންގެ އަތުން އެއްވެސް އިތުރު ޓެކުހެއް ނުނަންގަވާނެ ކަމަށާއި މިހާރު ނަގާ ޓެކްސް ބޮޑު ވެސް ނުކުރައްވާނެ ކަމަށް ވިދާޅުވި ވިދާޅުވުމެވެ. އެވާހަކަފުޅު ބަދަލުކުރައްވައި އިތުރު ޓެކްސް ތައާރަފު ކުރައްވައި ނަގަމުން އަންނަ ޓެކްސް އެތައް ގުނައަކުން ބޮޑުކުރެއްވުމުން އެމަނިކުފާނު ވެވަޑައިގެންނެވި ވައުދުފުޅާ ޚިލާފުވެވަޑައިގެންނެވީ އެވެ. އެހެންކަމުން އެމަނިކުފާނަށް ނިސްބަތް ކުރާއިރު ކުރިން ހެއްދެވީ އިތުރުފުޅެކެވެ. އާންމު މީހެއްނަމަ އެވާނީ ދޮގަކަށެވެ. އެފަދަ މީހަކަށް ދިވެހި ބަހުން ކިޔާނީ ދޮގުވެރިޔާ އެވެ. އަރަބި ބަހުން ކައްޒާބެވެ. އެހެން ނަމަވެސް އަޅުގަނޑުމެންގެ ރައީސަށް ކައްޒާބު ކިޔާކަށް ނުވާނެ އެވެ.