އަލިފާނުގެ ހާދިސާގައި ހައުސިން އަދި ކޮންސްޓްރަކްޝަން މިނިސްޓްރީ ހުންނަ އޮފީސް އިމާރާތް އަނދައިގެން ދިޔަ ނަމަވެސް، ވުޒާރާތަކުގެ މުހިއްމު މައުލޫމާތުތައް އިއާދަކުރެވޭނެ ކަމަށް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެ އެވެ.

މިދިޔަ ބުރާސްފަތިދުވަހު ހިނގި ނުރައްކާތެރި އަލިފާނުގެ ހާދިސާ އާ ގުޅިގެން ހައުސިން މިނިސްޓްރީ ހިންގަމުންދިޔަ އިމާރާތުގައި ހިންގަމުންދިޔަ ކޮންސްޓްރަކްޝަން މިނިސްޓްރީ އާއި ތިމާވެއްޓާބެހޭ މިނިސްޓްރީގެ ހިދުމަތްތައް މިހާރު ވަނީ، ދަރުބާރުގެއަށް ބަދަލުކުރުމުގެ މަސައްކަތް ފަށާފަ އެވެ.

ދަރުބާރުގެއަށް ބަދަލުކުރި ވުޒާރާތަކުން ހިދުމަތް ދިނުމަށް ވަމުންދާ ތައްޔާރީތަކާ ބެހޭގޮތުން މީޑިއާތަކާ ވާހަކަދައްކަވަމުން މުއްތަލިބު ވިދާޅުވީ، އަލިފާނުގެ ހާދިސާގައި އިމާރާތް އަނދައިގެން ދިޔަނަމަވެސް، މިހާތަނަށް ބެލި ބެލުމުން ދައުލަތުގެ އިދާރާތަކުގެ މުހިއްމު ގިނަ ޑޭޓާތައް ބެކަޕް ނެގިފައި އެބަހުރި ކަމަށެވެ.

"ހަގީގަތުގަ ވެސް މިއީ އެތައް ބައެއްގެ މުޅި ދިރިއުޅުން، އަމިއްލަ ގެއެއް ނޫނަސް އެތައް ބައެއްގެ ހައްގުތަކެއް އެ ތަނެއްގައި ބިނާވެފައި އޮތް ތަނެއް ހައިސިން މިނިސްޓްރީ އަކީ. އެހެންވީމަ މިއީ އަގުކުރެވޭނެ ކަމެއް ނޫން. އެހެން ނަމަވެސް ދައުލަތުން ގެއްލިގެންދިޔަ މުދާތައް ވެލިއުކުރުމުގެ މަސައްކަތް އަޅުގަނޑުމެން ކުރާނަން. އެއްވެސް ރައްޔިތަކު ކަންބޮޑުވެނުލައްވާ،" އޭނާ ވިދާޅުވި އެވެ.

މުއްތަލިބް ވިދާޅުވީ މިނިސްޓްރީން ގެއްލިގެންދިޔަ ޑޭޓާތައް ބަލަމުންދާ ކަމަށާއި، ހައުސިންނާއި ރައްޔިތުންނާ ގުޅުންހުރި ޑޭޓާތަކުގެ ބެކަޕް ހުރިކަމުގެ ޔަގީންކަން ރައްޔިތުންނަށް އަރުވާ ކަމަށެވެ. އަދި މިއުޅެނީ ދައުލަތުގެ ވަރަށް ބައިވަރު ޑޭޓާތައް ގެއްލިގެން ނޫންކަމަށާއި ސަރުކާރުން ރައްޔިތުންނަށް ދޭންޖެހޭ އަދި ކޮށްދޭންޖެހޭ އެއްވެސް ކަމަކަށް ބުރޫ ނާރާނެކަމުގެ ޔަގީންކަން އެބައޮތް ކަމަށް ވެސް އޭނާ ވިދާޅުވި އެވެ.

މިނިސްޓަރު ވިދާޅުވީ އަލިފާނުގެ ހާދިސާގައި އަނދައިގެންދިޔަ ތިން މިނިސްޓްރީގެ ހިދުމަތްތައް މާދަމައިން ފެށިގެން އާއްމު ހާލަތުގައި ދެމުންގެންދާނެ ކަމަށެވެ. މިގޮތުން މުއައްޒަފުންނަށް ފާހާނާ ކުރުމާއި ކެފެޓީރިއާގެ ކަންކަން ހަމަޖެއްސުމުގެ މަސައްކަތް ކުރިއަށްދާކަން އޭނާ ފާހަގަކުރެއްވި އެވެ.

މުއްތަލިބު މިހެން ވިދާޅުވި ނަމަވެސް ހައުސިން މިނިސްޓަރު ހައިދަރު އިއްޔެ ވިދާޅުވެފައި ވަނީ ހައުސިން މިނިސްޓްރީގެ ސާވާ ސަލާމަތް ނުކުރެވި މިނިސްޓްރީގެ ހުރިހާ ލިޔެކިޔުމަކާއި ޑޭޓާތައް އަލިފާނުގެ ހާދިސާގައި އެއްކޮށް ނެތިގޮސްފައިވާ ކަމަށެވެ.