މިމަހުގެ 13 ވަނަ ދުވަހު ހައިދަރްއާބާދުގެ ސަންދްޔާ ތިއޭޓަރުގައި ހިނގި ތޮއްޖެހުމުގެ ހާދިސާއާ ގުޅިގެން ދެކުނު އިންޑިއާގެ އެންމެ މަޝްހޫރު ފިލްމީ ތަރި އައްލޫ އަރުޖުން ހައްޔަރު ކުރުމަށްފަހު ދޫކޮށްލައިފި އެވެ.

މިހާރު ސިނަމާތަކުގައި ދައްކަމުން އަންނަ އައްލޫގެ ފިލްމު "ޕުޝްޕާ 2" ރިލީޒް ކުރި ދުވަހު އައްލޫ ސަންދްޔާ ތިއޭޓަރަށް ދިޔައިރު އޭނާ ދެކިލަން އެތައް ހާސް ބަޔަކު އެތަނަށް އެއްވި އެވެ

ނަތީޖާއަކަށްވީ ފިތިބާރު ވެގެން 39 އަހަރުގެ އަންހެނަކު މަރުވުމެވެ. އެ ހާދިސާގައި އެ އަންހެން މީހާގެ ދަރިފުޅަށް ވެސް އަނިޔާވި އެވެ.

މި މައްސަލަ ހައިދަރްއާބާދުގެ ކޯޓަށް ހުށައެޅުމުން އައްލޫ 14 ދުވަހަށް ހައްޔަރު ކުރަން ނެރުނު އަމުރުގެ ދަށުން އޭނާ ހައްޔަރުކުރީ މިދިޔަ ހުކުރު ދުވަހުގެ ހެނދުނު އެވެ. އެހެން ނަމަވެސް އައްލޫގެ ފަރާތުން އޭނާގެ ވަކީލުން ހުށައެޅި ކަފާލާތުގެ ހުށައެޅުމާއެކު ހައްޔަރު ކުރިތާ މާ ގިނައިރެއް ނުވެ އޭނާ ވަނީ މިނިވަން ވެސް ވެފަ އެވެ.

ފިލްމުގެ ޕްރިމިއާ އިވެންޓުގެ ސަލާމަތީ ކަންކަން ބަލަހައްޓައިދިނުމަށް އެދި ފިލްމުގެ ޕްރޮޑިއުސަރުން ފުލުހުންނަށް ސިޓީއެއް ފޮނުވާފައިވީ ނަމަވެސް ފުލުހުން ބުނީ އެގޮތަށް ބާއްވާ ކޮންމެ އިވެންޓަކަށް ފުލުހުން ނުފޮނުވޭނެ ކަމަށެވެ.