ވައިޓަލް ރަޖިސްޓްރޭޝަންގެ ޚިދުމަތް، މި ހަފުތާ ތެރޭގައި މާލެއިން ދޭން ފެށުމުގެ މަސައްކަތް ކުރަމުން އަންނަ ކަމަށް މާލޭ ސިޓީ ކައުންސިލުން މިއަދު ބުނެފި އެވެ.

ސިޓީ ކައުންސިލުން ކުރިން އެ ޚިދުމަތް ދެމުން އައީ މިދިޔަ ބުރާސްފަތި ދުވަހު ހިނގި އަލިފާނުގެ ހާދިސާގައި އަނދައި ހުލިވި ހައުސިން މިނިސްޓްރީގެ އިމާރާތުގަ އެވެ. އެ އިމާރާތުގައި ރޯވުމުން ބައެއް ލިޔެކިޔުންތައް ގެއްލި, އަނެއްބައި ލިޔެ ކިޔުމަށް ބޮޑެތި ގެއްލުންތަކެއް ލިބިފައިވާއިރު، މި ވަގުތު ވައިޓަލް ރަޖިސްޓްރޭޝަންގެ ޚިދުމަތް ދެމުން އަންނަނީ, ހުޅުމާލޭ އަމީން އެވެނިއުގެ ފުރަތަމަ ފަންގިފިލާގައި ހުންނަ މާލެސިޓީގެ އޮފީހުންނެވެ.

ސިޓީ ކައުންސިލުން ބުނީ ވައިޓަލް ރަޖިސްޓްރޭޝަންގެ މަސައްކަތްތައް އަލުން މާލޭގައި މި ހަފުތާގެ ތެރޭގައި ފެށުމުގެ މަސައްކަތް ކުރަމުން އަންނަ ކަމަށެވެ.

މި އަލިފާނުގެ ހާދިސާގައި ލިބުނު ގެއްލުންތަކުގެ ސަބަބުން އެ ތަންތަނުގައި ހިންގަމުން އައި އޮފީސްތައް މިއަދު ވަނީ ދަރުބާރުގެއަށް ބަދަލުކޮށް، ހިންގަން ފަށައިފަ އެވެ.

ދަރުބާރުގޭގައި ޚިދުމަތް ދޭން ފެށީ، އަލިފާނުގެ ހާދިސާ ހިނގި ދެ އިމާރާތުގައި ހިންގި ހައުސިން މިނިސްޓްރީއާއި އިންފްރާންސްޓްރަކްޗާ މިނިސްޓްރީއާއި އެންވަޔަރަމަންޓް މިނިސްޓްރީގެ އިތުރުން އެންވަޔަރަމެންޓް ޕްރޮޓެކްޝަން އެޖެންސީ (އީޕީއޭ) އެވެ.

މި އަލިފާނުގެ ހާދިސާ ހިނގަން މެދުވެރިވި ސަބަބު ތަހުގީގު ކުރުމަށް ބޭރުގެ ތަޖުރިބާކާރުންގެ އެހީ ހޯދުމަށް ފުލުހުން ވަނީ ނިންމައިފަ އެވެ.