ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) ގެ މާލީ މުއާމަލާތްތައް ވަގުތީ ގޮތުން ހުއްޓާލަން އެ ކުންފުނީގެ އޮޑިޓަރު އަންގައިފި އެވެ.

އެޗްޑީސީގެ ޗީފް އިންޓާނަލް އޮޑިޓަރު ނެރުނު އިންޓާނަލް މެމޯއެއްގައި ވަނީ އެ ކޯޕަރޭޝަނުން ހިންގާ މާލީ ގިނަ މުއާމަލާތްތަކެއް ވަގުތީ ގޮތުން ހުއްޓާލަން އަންގައިފަ އެވެ.

އެޗްޑީސީގެ މި އިންޓާނަލް މެމޯގައި ވާގޮތުން "ބިންވެރިޔާ ސްކީމް"އާ ގުޅޭ ހުރިހާ މުއާމަލާތްތަކެއްގެ އިތުރުން ބިމާއި ކޮމާޝަލް އަދި ރެސިޑެންސް ޔުނިޓްތައް ދޫކުރުމާއި ވިއްކުމުގެ އެއްވެސް މުއާމަލާތެއް ނުކުރަން ވަނީ އަންގާފަ އެވެ.

ހަމައެހެންމެ އިމަޖެންސީ ހާލަތެއްގައި މެނުވީ އެއްވެސް ޕްރޮކިއުމެންޓް މުއާމަލާތެއް ވެސް ނުހިންގުމަށްވެސް ވަނީ އެ ކުންފުނީގެ މެމޯގައި ވަނީ އަންގާފަ އެވެ.

މީގެ އިތުރުން ފައިސާ ދެއްކުމުގެ އެއްވެސް މުއާމަލާތެއް ނުކުރުމަށާއި ކުންފުނިން އެއްވެސް މުވައްޒަފަކު ވަކިކުރުމާއި އަލަށް ކުންފުނީގެ މަގާމުތަކަށް މީހުން ނެގުންވެސް ހުއްޓާލަން ވަނީ އަންގާފަ އެވެ.

މި އެންގުން އަންގާފައި މިވަނީ ހުޅުމާލޭ ބިން ނުލިބޭ ބަޔަލަށް އޮޅުވާލައިގެން ބިންތަކެއް ދިން މައްސަލަ ފެންމަތިވެ އެކަމުގެ ޖިނާއީ ތަހުގީގެއް ފުލުހުން ފެށުމުންނެވެ.

މި މައްސަލާގައި އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ހިމެނޭ ގޮތަށް އެ ކުންފުނީގެ ޗެއާމަން ފިޔަވާ ބޯޑުގެ ހުރިހާ މެމްބަރުން ވަނީ ސަސްޕެންޑްކޮށްފަ އެވެ. އަދި ނުހައްގުން ގޯތި ލިބުނުކަމަށް ބުނާ ފަޒުލްގެ ބޭބެވެސް ފަޒީލްވެސް ވަނީ ސަސްޕެންޑްކޮށްފަ އެވެ. އޭނާ ހުރީ އެމްޑަބްލިޔުއެސްސީގެ ޑެޕިއުޓީ މެނޭޖިން ޑައިރެކްޓަރުގެ މަގާމުގަ އެވެ.