މިހާރު ކުރަމުންދާ ވިއްސާރައިގައި ފާއިތުވި 24 ގަޑީރުގެ ތެރޭގައި އެންމެ ގިނައިން ވާރޭ ވެހިފައި ވަނީ މާލެއަށް ކަމަށް މޫސުމާ ބެހޭ ގައުމީ އިދާރާ، މެޓް އޮފީހުން ބުނެފި އެވެ.

މި ދުވަސްވަރަކީ ހުޅަނގު މޫސުން ނިމި އިރުވައި މޫސުން ފެށޭ ދުވަސްވަރަށް ވުމާއެކު މި ދުވަސްވަރު އާއްމުކޮށް ކޮޅިގަނޑުތައް އުފެދޭ ކަމަށް މެޓް އޮފީހުން ބުނެފައިވެ އެވެ. އަދި ރާއްޖެއާ ކައިރީގައި ދެ ކޮޅިގަނޑެއް އުފެދިފައިވާތީ، މި ދުވަސްތަކުގައި މޫސުން ގޯސްވާނެ ކަމަށްވެސް މީގެ ކުރިން މެޓް އޮފީހުން ބުނެފައިވެ އެވެ.

މެޓް އޮފީހުން މިއަދު އާއްމުކޮށްފައިވާ ރެކޯޑުތަކުން ދައްކާގޮތުން މާލެއަށް 136.5 މިލިމީޓަރުގެ ވާރޭ ވެހިފައި ވާއިރު ދެން އެންމެ ގިނައިން ވާރޭ ވެހިފައި ވަނީ ހުޅުމާލެ އަށެވެ. ހުޅުމާލެއަށް 117 މިލިމީޓަރުގެ ވާރޭ ވެހިފައި ވާއިރު ބ. ދަރަވަންދުއަށް ވަނީ 111 މިލިމީޓަރުގެ ވާރޭ ވެހިފަ އެވެ.

ބޯކޮށް ވާރޭވެހުމުގެ ސަބަބުން އާއްމުކޮށް މަގުތަކުގައި ފެންބޮޑުވާ މާލޭގެ ގިނަ މަގުތަކުގައި މިއަދުވެސް ވަނީ ވަރަށް ބޮޑަށް ފެންބޮޑުވެފަ އެވެ.

އެމްއެންޑީއެފުން އަންނަނީ މަގުތަކުގައި ފެން ހިންދުމުގެ މަސައްކަތް ކުރަމުންނެވެ. މާލޭގެ ގެތަކަށް ފެން ވަންނާތީ ވެލި ބަސްތާ ޖެހުމުގެ މަސައްކަތް ކުރަމުންދާކަމަށްވެސް އެމްއެންޑީއެފުން ބުނެ އެވެ.

އެގޮތުން މާލޭގެ ފަސް ސަރަހައްދެއްގައި 16 ޕަމްޕު ބަހައްޓައިގެން ފެން ހިންދުމުގެ މަސައްކަތް އެމްއެންޑީއެފުން އަންނަނީ ކުރަމުންނެވެ.

އެ ސަރަހައްދުތަކުގެ ތެރޭގައި ވެސްޓްޕާކު ސަރަހައްދާއި އައިޖީއެމްއެޗް ސަރަހައްދާއި ވިލިނގިލީ ފެރީ ޓާމިނަލް ސަރަހައްދުގެ އިތުރުން ދިރާގު ސަރަހައްދު އަދި ޖެލީ ޕިއްޒާ ސަރަހައްދު ހިމެނެ އެވެ.

މިއަދު އައިޖީއެމްއެޗް ސަރަހައްދުގައި ވަނީ ވަރަށް ފެންބޮޑުވެފަކަން ފާހަގަކޮށްލެވެ އެވެ.

މި ހަފްތާ ބަންދުގައި މޫސުން އިތުރަށް ގޯސްވާނެކަމަށް މެޓް އޮފީހުން ވަނީ ލަފާކޮށްފަ އެވެ.